Секој ден 500-700 пати голтаме плунка, во поголемиот дел, несвесно. Уште почесто тоа го правиме во текот на оброците, а околу три пати на час во текот на спиењето. За голтањето во принцип воопшто и не размислуваме, се додека оваа едноставна активност не стане премногу болна.
Како дишењето, голтањето е неопходно за живот, затоа кога ќе почувствуваме чувство на гребење, кога грлото ни е суво, отечено и надразнето, подготвени сме да испробаме бројни можноста само да си ја олесниме маката.
Сето ова ја опишува болката во грло, здравствена тегоба со бројни различни причинители. Таа често трае кратко, неколку денови и секогаш не мора да биде симптом на некоја болест. Може да се појави и како реакција на напрегање на мускулите на грлото (викање, гласен говор или пеење), студени напивки, дишење на уста (како на пример при ‘рчење), сув воздух во просторијата во која што престојувате, пушење или вдишување на воздух загаден со чад од цигари, како и на вдишување на надворешен загаден воздух. Иритација на грлото може да се појави и при алергија кога е предзвикана со засилено слевање на секретот по задниот дел од грлото. Болката во грло главно не е особено загрижувачка, бидејќи симптоми во поглем дел сами се повлекуваат за два до седум дена, дури и ако никако не се третираат. Но, ако во рок од неколку дена не забележите дека болката постапно почнува да се намалува, особено ако имате и други симптоми како на пример покачена телесна температура, секако треба да отидете на лекар.
ИНФЕКЦИЈА НА ГРЛОТО
Во некои случаи, болката во грлото може да сугерира акутно воспаление на грлото, особено во зимските месеци. Во однос на зафатениот дел, разликуваме три типа на инфекции на грлото: воспаление на ждрелото (фарингитис), крајниците (тонзилитис) и воспаление на гркланот и гласните жици (ларингитис). Генерално, болката во грлото спаѓа меѓу најчестите причини за посета на матичен лекар. Често, болката во грлото е проследена со други симптоми како што се главоболка, засипнатост, течење на носот, кашлица, покачена телесна температура и општа слабост. Доколку оваа состојба потрае неколку дена, неопходно е да се консултирате со лекар.
Притоа, најважно за лекарот ќе биде да утврди дали инфекцијата на грлото е вирусна или бактериска.
Воспаленијата на грло предизвикани од вируси се јавуваат како еден од симптомите на обична настинка, грип, мононуклеоза, сипаници, заушки, но и болеста КОВИД-19 што ја предизвикува SARS-CoV-2 вирусот.
Вирусна респираторна инфекција, како што е обичната настинка која е најчеста, може да препознаете ако покрај болката во грло која постепено расте имате и респираторни симптоми како течење на носот, засипнатост и/или кашлица. Зголемувањето на телесната температура кај многу вирусни инфекции е благо или воопшто не е присутно, а општите симптоми на болеста, како што се општа слабост и болки во зглобовите и мускулите, се послабо изразени. Ждрелото изгледа малку поцрвено од останатиот дел од слузницата во усната шуплина и надразнето.
Но, ако инфекцијата на грлото е бактериска, на пример во случај на стрептококна ангина, ждрелото ќе биде многу црвено и ќе бидат видливи бело-жолти гнојни јазли, особено на крајниците. Притоа, покрај болката во грлото, присутно е и покачување на телесната температура, често со треска и главоболка, како и болки во мускулите, а лимфните жлезди на вратот се зголемени и болни. Општо, сите симптоми на болеста ќе бидат многу посилно изразени отколку кај вирусната инфекција, а симптомите како кашлица и течење на носот, главно нема да бидат присутни.
КОВИД БОЛНО ГРЛО
Болката во грлото е само еден од можните симптоми на КОВИД-19, а се јавува многу поретко од треската, кашлицата и заморот, кои се речиси секогаш се присутни. Според податоците од мета-анализа на 148 студии и околу 24.000 пациенти, околу 12 отсто од пациентите со КОВИД-19 пријавиле болки во грлото. Ако поради постоење на покачена температура и слабост се двоумите дали се работи за бактериско воспаление на грлото или КОВИД-19, може да ви помогне податокот дека болното грло кај КОВИД-19 не се јавува наеднаш, како и дека покрај овој симптоми се јавуваат и други како сува кашлица, отежнато дишење, краток здив, затнат нос, како и губење на вкус и/или мирис и лоша дигестија, кои не се јавуваат при бактериско воспалено грло. Во секој случај, доколку се сомневате на бактериско воспаление или КОВИД-19, контактирајте го вашиот матичен лекар.
