![1](https://panacea.mk/wp-content/uploads/2020/10/1-696x464.jpeg)
Проф. д-р Мирко Ивчиќ, специјалист оториноларинголог, истакнува дека слузницата на носот е прва на удар од коронавирусот, па поради тоа чувањето и одржувањето на слузницата на носот здрава е исклучително важно, бидејќи на тој начин се одржува природната бариера и се намалува можноста за инфекција.
КАКО ИСПИРАЊЕТО НА НОСОТ ПОМАГА ВО ЗАШТИТАТА ОД КОРОНАВИРУСОТ?
Се покажало дека физичкото отстранување на вирусот со испирање на носот е добра превентивна мерка за развој на потешка форма на болеста КОВИД-19, а со неа се намалува и можноста за пренесување на вирусот на блиско лице.
За испирање на носот се препорачуваат раствори од кујнска сол со одредени концентрации. Испирањето може да се прави или со хипертоничен или физиолошки раствор. Истражувањата докажале дека испирањето со хипертоничен раствор е поефикасно во намалување на тегобите и траењето на воспалението на горните дишни патишта.
КАКО ДА ПОДГОТВИТЕ ХИПЕРТОНИЧЕН РАСТВОР И КАКО ДА ГО КОРИСТИТЕ?
Доволно е во половина литар чиста или претходно провриена млака вода да растопите една мала лажичка кујнска морска сол. Со помош на сад или систем за испирање на носот, со вака подготвениот раствор може да се испира носот.
Оптималната количина на раствор со која се испира носот, било со сад или со т.н. рог, е околу 200 до 250 мл за секоја страна на носот.
Постапката е едноставна и за неа се потребни вкупно пет минути. Доколку постои било каква пречка или страв од влевање течност во носот (вообичаено се работи за психичка бариера), испирањето може да се прави со користење на спреј со хипертоничен раствор. Во тој случај, постапката на испирање треба да се повторува повеќе пати дневно.