До денес сите сме имале можност да прочитаме дека се повеќе студии ја поврзуваат редовната физичка активност, па дури и да се работи со мали чекори, со долговечноста.
Но, дали постои активност која се издвојува кога станува збор за долговечноста? Основачот на популарната филозофија „Blue Zone“, Ден Бутнер, има одговор, кој можеби ќе ве изненади, но и ќе донесе олеснување. Овој познат автор на книги за најдолговечните луѓе на светот, вели дека не постои подобра активност за долговечност од пешачењето! Според него, една брза прошетка може да ви понуди околу 90 проценти од придобивките од маратонскиот тренинг. Не само тоа, можете да пешачите секој ден до крајот на животот, а самото одење ќе вклучи повеќе од 100 мускули и ќе ги подобри когнитивните функции.
Батнер открива дека редовното движење е токму навика вкоренета во животот на луѓето кои живеат во Сината зона. Зад идејата за Сината зона стои динамичен начин на живот, а се заснова на знаењето на авторот откако посетил 5 земји во светот, кои имаат најголем број жители кои го прославиле својот стоти роденден. Неговата работа се заснова на животниот стил – од она што го јадеме, колку се дружиме и како факторите од околината влијаат на нашите животи.
“Луѓето кои живеат во Сината зона имаат една навика која се истакнува – вежбаат на секои 20 минути, но не затоа што следат одреден режим, туку затоа што живеат во таква средина каде што е потребно“, објаснува тој.
Истражувањата ја поддржуваат идејата дека дури и микро чекорите во текот на денот се добра навика и можат да го поддржат здравјето и долговечноста на мускулите, дури се смета и повеќе од тренинг во теретана. Пешачењето има низа позитивни ефекти на нашиот организам, па така ќе ја подобрите циркулацијата, ќе го зголемите респираторниот капацитет, ќе ги зајакнете мускулите, ќе ја подобрите работата на дигестивниот систем и ќе се ослободите од стресот и напнатоста.
Само 10 минути пешачење во денот е поврзано со продолжување на животот кај повозрасните лица.
КАКО ДА ПЕШАЧИТЕ И ДА ГИ ИСКОРИСТЕТЕ СИТЕ БЕНЕФИТИ?
Удобни чевли, малку добра волја и слободно време ќе бидат сосема доволни и прифатливи за почеток за сите, вклучувајќи ги и луѓето со прекумерна тежина, за кои ова ќе биде идеален избор на физичка активност на патот кон промена на нивниот начин на живот.
КАКО ПРАВИЛНО ДА ПЕШАЧИТЕ?
1. Држете го грбот исправен, главата високо, погледот неколку метри пред вас, рамената опуштени, а стапалата паралелни
2. Благо свиткајте ги рацете во лактите и движете се во ритам со спротивната нога
3. Прво спуштете ја петата, а потоа остатокот од стапалото на земја
4. Затегнете ги стомачните мускули за да го поддржите ‘рбетот и да одржувате правилно држење на телото
5. Прилагодете ја брзината на дишење на брзината на одење.
