Шумската градинка „Самовили и џуџиња“ во Дорсет во Англија, добила највисоки оценки од Бирото за стандарди во образованието заради тоа што децата место да си играат со технолошки достигнувања, учат да ракуваат со пили и оган. Иако денес стандардите за безбедност се построги од кога било, стручњаците за образование решиле да ги поддржат педагозите кои се истрајни во борбата за детство исполнето со природа и предизвиците кои таа ги нуди.
Оваа градинка се наоѓа среде шума и нема ни вода за пиење ни струја. Шест воспитувачки ги надгледуваат децата додека тие се качуваат по дрвја, висат на јажиња, сечат зеленчук и готват ручек на отворен оган.
Инспекторите на Бирото биле задоволни со тоа што децата благодарение на престојот на отворено покажале мошне високо ниво на самодоверба и независност.
„Децата се исклучително мотивирани со широка палета на предизвици и поучни искуства. Додека го истражуваат природното шумско опкружување, сосема се посветени на учењето“, напишале во извештајот.
Децата времето го поминуваат на отворено без оглед на тоа дали надвор е дождливо или дува ветер, затоа што градинката се води со мотото: „Не постои лошо време, постои само погрешна облека.“
Децата еден просечен ден поминуваат покрај оган пеејќи песни, градејќи колиби и цапкајќи по барички. Математика учат со помош на гранчиња, а лисјата и кората од дрвјата ги користат за создавање уметнички дела. Исто така, одгледуваат и свои билки и месат сопствен леб.
Штом почне да врне облекуваат мантилчиња за дожд и гумени чизмички и се „кријат“ под натстрешницата од гранки.
Градинката постои од 2007 година, а ја основала Кирстин Фрир
„Веруваме дека децата се онолку среќни колку што се и блиски со природата, во која најдобро учат. Пораснав кампувајќи со семејството во природа, како и моите деца, но сфатив дека многу деца немале такви искуства. Многу деца се потполно отуѓени од природата и растат во четири ѕида, опкружени со модерна технологија. Ние се обидуваме да воспитаме тинејџери кои нема лесно да се досадуваат, туку ќе умеат да го ценат светот кој ги опкружува“, рекла во една прилика Кирстин.
Погледнете уште неколку фотографии:
