Последниве години е многу популарна операцијата за бразилско зголемување (подигање) на задникот, која подразбира префрлање на сало од стомакот и бутовите во задникот. Оваа естетска операција станала популарна благодарение на звездите како Ким Кардашијан, Ники Минаж и други жени кои имаат поголем задник.
Меѓутоа, од организацијата MultiSociety Gluteal Fat Grafting Task Force која ја сочинуваат пет помали здруженија, велат дека токму оваа естетска операција има најголема стапка на смртност.
Тие ги повикале естетските хирурзи да ги преиспитаат своите техники за да утврдат зошто оваа интеревнција е толку ризична. Минатата година, на Флорида три жени починале по операцијата на бразилско зголемување на задникот. Според истражувањата, препораката до хирурзите била да оперираат што подалеку од глутеалниот нерв, кога на пациентите им го зголемуваат задникот. Оваа организација тврди дека кога станува збор за ваква операција, една од 3.000 завршува со смртни последици, што е највисок степен на смртност меѓу естетските зафати. Споменатата организација, која го претставува и Американското здружение на пластични хирурзи, смета дека до смртен исход доаѓа по расцеп на големите вени кои ги запушува префрленото сало. Исто така, аутопсиите од некои пациенти покажале дека смртта настапила затоа што хирурзите салото го вбризгале подлабоко отколку што смееле.
Меѓу другото, стручњаците предупредуваат дека пацинетите кои сакаат драстично зголемување на задникот, треба тоа да го прават постепено, со повеќе операции, а не одеднаш.
На ваково зголемување на задникот, во последните пет години се одлучиле 50% повеќе жени од претходно, а операцијата чини од 7.400 до 11.500 евра.
Името бразилско зголемување на задникот станало општо прифатено по 1996 година кога д-р Леонард Гросман прикажал операција со префрлање на салото од други делови на телото во задникот на пациентка од Бразил.
