Колку пати родителите ви рекле – не излегувајте надвор со мокра коса, особено ако е студено. Веројатно, сте чуле и дека не треба да излегувате надвор два часа откако ќе ја исушите косата?! На прашањето „зошто“ сте добивале некој од овие одговори: ќе се разболеш, ќе ти се искриви лицето, ќе добиеш воспаление на мозокот…
ТРЕБА ДА ЗНАЕТЕ – ВОСПАЛЕНИЕ БЕЗ ПРИЧИНИТЕЛ НЕ Е ВОЗМОЖНО! Што значи дека мора да постои бактерија, вирус или габичка која ќе направи проблем, а самата мокра коса никако не може да предизвика воспаление. Мократа коса може да го потпомогне разболувањето ако постои причинител, но ако го нема не можете да се разболете само затоа што сте излегле надвор со мокра коса.
Спиењето со мокра коса е многу поопасно, затоа што е поголема опасноста од развој на габични инфекции на темето на главата. Влагата продира во перницата заедно со излупените ќелии од темето и така создава легло за габичките „malassezia“ на кои им треба влажна околина, а доведуваат до чешање особено кај личностите кои имаат себореичен дерматитис, кога е зголемено лачењето на лојните жлезди.
За време на зимата и во текот на студените денови воопшто мократа коса и кожа засилено испуштаат топлина од телото, па така доведуваат до намалување на температурата на телото што може да биде непријатно.
Мократа коса уште е и покршлива од сувата, па може да дојде со голем губиток коса со што ќе се намали густината, а тоа е најчеста причина заради која не треба да спиете или излегувате со мокра коса надвор!
