Рестораните ширум светот послужуваат оброци кои го надминуваат препорачаното количество калории, покажале резултатите од последната студија. Кога се во прашање најпопуларните јадења во класичните ресторани, дури 94 проценти од нив ги надминуваат препорачаните 600 калории.
Речиси три четвртини (72 отсто) од популарните нарачки во рестораните за брза храна или на уличните штандови, исто така, го надминуваат препорачаното калориско ниво. Повеќето претеруваат и во количеството на послужената храна, а не само во калориите.
„Не само што јадеме погрешна храна, туку и ја консумираме премногу“, вели главната авторка на студијата Вивијан Суен од медицинскиот факултет во Сао Пауло и додала: „И често го занемаруваме тој фактор кој има големо влијание на глобалната дебелина.“
Група меѓународни научници ја мерела тежината и енергетската вредност (калориите) на јадењата кои се послужувале во рестораните во Бразил, Кина, Финска, Гана и Индија.
Светската здравствена организација дебелината ја смета за глобална епидемија и главен ризик за развој на срцеви и мозочни болести и дијабетес. Организацијата проценува дека 1,9 милијарди возрасни во светот патат од прекумерна тежина, а 600 милиони се дебели.
