Наутро кога ќе се разбудиме тоа во повеќето случаи значи дека во изминатите 7-8 часа сме без вода, односно отприлика толку време поминало откако последен пат сме пиеле вода. Ова би значело дека денот најчесто го започнуваме благо дехидрирани затоа мошне е важно по будењето да го надоместиме тој недостаток.
Наједноставно решение е да испиеме две чаши вода. На овој начин на телото ќе му ја обезбедиме неопходната течност и истовремено ќе го поттикнеме метаболизмот и исфрлувањето на токсините. Доколку во водата додадете и сок од половина или цел лимон, ќе си обезбедите и витамин Ц кој го зајакнува имунитетот и го подобрува изгледот на кожата.
Зелениот чај (најдобро претходно приготвен и изладен), исто така, ќе обезбеди изобилство на антиоксиданти и ќе го поттикне согорувањето на масти уште од утрото. Сепак доколку имате чувствителен желудник или гастритис, одбегнувајте да пиете зелен чај на гладно.
Сок од овошје и зеленчук од рано наутро ќе ви обезбеди доза на дополнителна енергија. Одберете ја омилената комбинација на овошје и зеленчук – би било добро да не го заборавите зеленчукот богат со железо како што се спанаќот и цвеклото.
За оние со чувствителен стомак добар избор е и чајот од ѓумбир, додека кај мамурлак помага сокот од домати. Одбегнувајте на празен стомак да пиете напитоци како што се засладени сокови и газирани напитоци, енергетски и алкохолни пијалаци, но и кафе.
