Верувале или не, повеќето нови (млади) крвни клетки кои ги произведува телото доаѓаат од коскената срж – масна супстанца која се наоѓа во топчестите завршетоци на коските. Кај заболените од леукемија една од клетките од коскената срж мутира и станува канцерогена, а потоа се клонира – прави сопствени копии и на овој начин болеста напредува.
Докторката Марта Ведлеј открива дека ризичната возрасна доба за возрасните е меѓу 50 и 70 година од животот, иако во поново време леукемијата ги напаѓа и младите луѓе.
„Постојат неколку поттипови леукемија, кои се одредуваат според видот на клетката која мутира, како и во која фаза од производството на клетката почнува мутацијата“, објаснила онкологот Мередит Барнарт.
Кога станува збор за симптомите на леукемија, двете докторки се согласни – не постои јасен симптом.
„Симптомите зависат од поттипот, но многу од нив се заменуваат со обичен грип“, вели Барнарт.
Сепак, и двете советуваат да посветите внимание на следните промени:
Бледа кожа
„Кога се развива леукемијата, младите крвни клетки оштетени од канцерот можат да ја преплават коскената срж и така да го отежнат производството на здравите клетки. Заради тоа што во телото имате помалку здрави, а повеќе оштетени клетки може да дојде до анемија, а со самото тоа и бледило на кожата, особено на лицето“, објаснила Барнарт. Анемијата може да предизвика и постојано чувство на студени раце.
Умор
„Како и кај многу други болести, заморот е вообичаен симптом за леукемијата“, вели Ведлеј. Ако постојано се чувствувате исцрпено и немате енергија, а претходно сте имале доста, би требало да појдете на лекар. Анемијата, исто така, може да биде причина за заморот.
Инфекции и температура
Крвните клетки се мошне важна компонента на имуниот систем. Ако тие не се здрави, како што е тоа случај со леукемијата, личноста многу често се разболува. Ведлеј вели дека инфекциите и температурата се уште еден од симптомите кои најчесто се забележуваат кај леукемијата.
Краток здив
„Заедно со недостатокот на енергија, краткиот здив е нешто на што, исто така, треба да се посвети внимание“, истакнува Барнарт. Посветете внимание на моментите за време на физичка активност, ако забележите дека немате воздух или ви се чини дека дишењето е поразлично од порано, тоа кажете му го на вашиот лекар.
Бавно зараснување на раните
Ако исечениците долго зараснуваат, а модринките лесно се појавуваат, треба да знаете дека тоа може да биде симптом на леукемија. Малите црвени точкички по кожата, попознати како петехии, исто така, можат да се јават заради леукемија, а кај овие болести тие се јавуваат најчесто по нозете, велат докторките.
Други симптоми на леукемија
„Покрај наведените, симптоми на леукемија можат да бидат и ноќното препотување и чувствителните и болни зглобови“, открива Барнарт, а Ведлеј вели дека треба да се обрне внимание и на губењето тежина. Крвавењето од носот, отечените или зголемени лимфни јазли, падот или скокот на телесната температура, исто така, се симптоми на оваа болест.
Дијагноза:
Ако докторот се посомнева на леукемија ќе ве испрати на дополнителни тестови за да се утврди бројот на црвени крвни зрнца и тромбоцити. Ако резултатите ја потврдат претпоставената дијагноза, лекарот ќе ве испрати кај хематолог, доктор специјализиран за пореметувања и рак на крвта, кој ќе го одреди типот на болеста и начинот на лекување.
