За дегенеративните ревматски болести не постои ефикасен лек за целосно излекување, бидејќи станува збор за незапирлив процес. Терапијата која се применува е симптоматска. Се повеќе се користат хондропротективни препарати за кои постојат доволен број клинички сознанија за нивно успешно делување. Препаратите се аплицираат преку инјекции кои докторот ги става директно во заболениот зглоб, а може да се земаат и орално, како таблети. Потврдено е дека овие препарати го успоруваат процесот на оштетување на ‘рскавицата.
Меѓутоа, за барем некое време да се одложи појавата и развојот на овие болести, во превентивна смисла, треба да се почитуваат одредени правила цел живот. Исхраната мора да се заснова на внесување на калциум, за да се обезбеди цврстината на скелетот. Телесната активност исто така треба да се практикува соодветно на возраста и интензитетот на болеста.
За секоја возраст постојат соодветни вежби кои треба да ги препорача стручњак. За постарите лица, кај кои дегенеративните промени се најизразени, се советува прошетка со брзо одење, колку е тоа во нивна моќ. Брзото одење е важно, бидејќи влијае на зглобовите, зголемувајќи ја цврстината на коските. Пливањето исто така е ефикасно, како и возењето веолосипед.
