Витамин А – препарати со овој витамин се користат со цел ублажување на проблемите со акните и брчките. Кожата можеме да ја негуваме и „одвнатре“ со тоа што ќе јадеме повеќе намирници богати со витамин А, како што се морковите, слаткиот компир, тиквата, кајсиите, праските, зелениот лиснат зеленчук (спанаќ, блитва, кељ), како и црн дроб, јајца и рибино масло.
Витамини од Б-комплексот – за здрава кожа, како и коса и нокти, неопходно е секојдневно да внесуваме доволно витамини од Б групата со кои се богати мешунките, интегралните житарки, јаткастите плодови и семките, млечните производи, јајцата, пилешкото месо, јунешкото и говедското. Кога е во прашање козметиката, препаратите со витамините Б3 (ниацин) и Б5 (пантотенска киселина) помагаат кожата да ја задржи влагата и еластичноста, и ја ублажуваат хиперпигментацијата.
Витамин Ц – истражувањата покажале дека исхраната богата со витамин Ц ја штити кожата од штетното УВ зрачење со тоа што ја подобрува ефикасноста на препаратите за заштита од сонце. Намирниците како што се цитрусите, кивито, ананасот, јагодите, зелениот лиснат зеленчук, пиперките и брокулите претставуваат најдобри извори на витамин Ц. Витаминот Ц е антиоксидант и делува противвоспалително, па затоа често се користи и како активна состојка во препаратите за нега на кожа склона на акни. Козметиката со витамин Ц, исто така, ја ублажува хиперпигментацијата и го поттикнува производството на колаген со што се подобрува еластичноста и изгледот на кожата.
Витамин Е – овој витамин исто делува како антиоксидант и одличен е во комбинацијата со витамин Ц. Ја поттикнува синтезата на колаген и на тој начин ја ублажува појавата на брчки и други видливи знаци на стареењето. Производите за нега со витамин Е, исто така, се препорачуваат кај сува кожа и проблеми со стрии. Адекватниот внес на витамин Е преку исхраната ќе придонесе за поубав, младешки изглед на кожата. Меѓу најдобрите прехранбени извори на витамин Е спаѓаат: пченични никулци, бадеми, лешници, кикиритки, семки од сончоглед, авокадо, спанаќ, блитва, брокули и домати.
Витамин К – препаратите за нега со витамин К го забрзуваат заздравувањето на повредите и можат да ја ублажат појавата на испукани капилари, модрици и лузни. Доволен внес на витаминот К2 (облик на витаминот К кој се наоѓа во намирниците од животинско потекло и ферментираната храна) ја подобрува еластичноста на кожата и на тој начин ја превенира појавата на брчки.
