Црниот дроб е еден од најважните органи во телото. Се што внесуваме во организмот, минува низ црниот дроб. Таму се обработува пред да се дистрибуира низ останатите делови во телото. Црниот дроб игра бројни улоги во физиолошките процеси на организмот коиимаат широка лепеза на функции. Постојат неколку лоши навики кои може да доведат до оштетување на овој витален орган.
Состојба во која е загрозена здравата функција на црниот дроб, може за човекот да биде смртоносна. За да го спречите тоа, размислете да се откажете од овие пет лоши навики, кои на долги патеки може сериозно да му наштетат на овој орган.
Претерано консумирање алкохол
Оваа лоша навика е најчест причинител за оштетување на црниот дроб. Премногу алкохол во организмот ја намалува способноста на црниот дроб да ги филтрира токсините од телото. До тоа доаѓа од причина што црниот дроб ги користи сите свои ресурси за вишокот алкохол во организмот да го претвори во помалку токсична форма. Тоа може да предизвика состојба која се нарекува масен црн дроб или да доведе до воспалителни процеси во овој важен орган.
Прекумерна употреба на лекови
Консумирањето на различни лекови, надвор од границите на нормалното, може да доведе до токсичен хепатитис. Оштетувањето може да варира од поблага воспалителна состојба до целосно затајување на црниот дроб.
Пушење
Пушењето е лоша навика која има неколкукратен негативен ефект на здравјето, вклучувајќи го и здравјето на црниот дроб. Отровните хемикалии кои се наоѓаат во димот од цигарите и кои ги оптоваруваат белите дробови, на крајот може да достигнат и до црниот дроб и да предизвикаат оксидативен стрес – состојба во организмот која се јавува кога слободните радикали ги надвладеале механизмите на антиоксидативна заштита и при тоа може да ги нападнат клетките на црниот дроб.
Недостаток на сон
Недостатокот на сон може да доведе до различни здравствени компликации, а научните истражувања потврдиле дека честото недоволно спиење може да доведе до оксидативен стрес во црниот дроб.
Лоша исхрана и дебелина
Прекумерната тежина често е поврзана со седечкиот начин на живот и лошите прехранбени навики, кои можат долгорочно да го оштетат црниот дроб. Консумирањето на погрешен вид на храна го оптоварува црниот дроб и може да предизвика таложење на масти на самиот орган што може да доведе до развој на неалкохолни масни болести на црниот дроб (NAFLD).
