Повеќето производи за шминкање како што се четките за руменило, маскарите, кармините и популарните сунѓерчиња за нанесување течна пудра и прајмер, се контаминирани со бактерии потенцијално опасни по животот, предупредуваат истражувачите.
„Производите за шминкање што секојдневно ги користат милиони ширум светот се контаминирани со потенцијално смртоносни бактерии како што се ешерихија коли и стафилококи, затоа што повеќето не ги чистат и ги користат долго после истекот на рокот“, вели водечкиот автор на студијата Амрен Башир од универзитетот Астон во САД.
Според студијата објавена во магазинот „Journal of Applied Microbiology”, во девет од десет производи се најдени бактерии кои можат да предизвикаат болести во распон од кожни инфекции до труење на крвта ако се користат во близина на очите, устата или исеченици. Овој ризик се засилува кај личностите со ослабен имунитет кои имаат поголеми шанси за да се заразат со овие бактерии.
Откриено е дека популарните сунѓерчиња кои се користат за нанесување течна пудра и прајмер имаат највисоко ниво на потенцијално штетни бактерии, со тоа што повеќето од овие производи никогаш не се чистат. Споменатите сунѓерчиња за апликација често се поддржани од славните личности ширум светот, што придонесува за поголема продажба, без размислување за потенцијалната опасност по здравјето.
Истражувачите откриле дека овие производи се особено подложни на контаминација, затоа што после употребата често остануваат влажни, што создава идеални услови за развој на штетни бактерии.
„Лошата хигиенска пракса на потрошувачите кога е во прашање употребата на шминката е мошне загрижувачка кога ќе земете предвид дека најдовме бактерии како ешерихија коли во производите кои ги тестиравме“, рекол Башир.
Наодите откриваат дека потрошувачуте несвесно се доведени во опаснот и дека произведувачите и регулаторните тела би требало да сторат повеќе за заштита на купувачите така што датумот на траење и начинот на одржување посебно ќе го истакнат на амбалажата.
„Недозволиво е бактеријата ешерихија коли да се најде во која било концентрација во козметички производи и средствата за нивно нанесување“, нагласуваат истражувачите.
