Одамна се потенцира тоа дека компјутерите имаат штетно влијание врз детскиот мозок, а новата студија и го докажа тоа. Научниците кои го спровеле истражувањето анализирале снимки на мозок кај 47 деца на возраст од 3 до 5 години (од кои 27 биле девојчиња, а 20 момчиња), а потоа резултатите ги споредиле со тоа колку време поминувале пред екраните. Кај децата кои поминувале најмногу време пред таблет, телефон или телевизор забележано е помало количество миелин, заштитната обвивка околу нервните ќелии на мозокот и ’рбетниот мозок. Инаку, миелинот, белата мозочна маса помага во праќање пораки од едниот до другиот дел од мозокот низ нервните завршетоци. Тие нервни завршетоци влијаат на вештините како што се читање, говор и размислување.
Авторот на студијата, доктор Џон Хјутон и неговите колеги направиле и анкета меѓу родителите во врска со тоа колку време децата поминуваат пред екраните. Се покажало дека децата кои поминуваат повеќе време пред екраните имаат помал квалитет на мозочната маса што влијае на формирањето на миелин т.е супстанца која ги покрива нервните влакна во мозокот. Тој е важен и за брзината со која информациите се пренесуваат во мозокот. Од друга страна, колку поспоро се развива мозокот, толку поспоро сигналите и информациите патуваат до него.
