Мултипла склероза (МС) е прогресивна невролошка болест којашто ги оштетува нервите што резултира со појава на симптоми како што се вкочанетост, слабост, замор, болки во мускулите, проблеми со видот и др. Кај некои луѓе, МС може да биде агресивна и брзо да напредува, додека кај други, може да биде блага и да напредува со побавно темпо.
По невидливите симптоми на болеста и здравата исхрана при МС, новиот подкаст на Националното здружение за помош и поддршка на лицата со мултипла склероза го посветуваме уште една многу битна тема – улогата на физикалната терапија во третманот на мултипла склероза. Наш гостин е Илија Жежов, соработник и пријател на Здружението, добро познат физиотерапевт кому пациентите му веруваат.
„Физиотерапијата е една клучна гранка којашто помага во овој процес на лекување, бидејќи со физиотерапијата не само што се попречува прогресијата на болеста, туку се прави подобрување во целокупното здравје на пациентите. Во практика, кај пациентите со МС употребуваме кинезитерапија, којашто има главна улога, тука исто така би ја спомнал и медицинската масажа, која е многу корисна, затоа што освен што ја раздвижува добро циркулацијата и ја зајакнува самата мускулатура и со 30-45 мин. најмногу до 1 час масажа, пациентите со МС имаат голем бенефит од тоа: подобрување во начинот на одењето, во рамнотежата, подобрување во самиот мускулен тонус – зајакнување, и пред се, добар доток на циркулација и стабилизација на самата рамнотежа“, вели Жежов во подкастот.
Целиот разговор со Илија Жежов, физиотерапевт може да го погледнете тука на порталот Панацеа.мк или на нашиот Youtube канал.
