Од денот кога се појави коронавирусот, дел од луѓето почувствуваа пораст на анксиозноста, а добро е познато како високото ниво на стрес може да влијае на здравјето на срцето.
Според резултатите од неодамна објавено истражување, “синдромот на скршено срце“ е во пораст последниве неколку месеци, а т.н. Такоцубо синдром или кардиомиопатија предизвикана од стрес е ретка состојба која на почетокот често се заменувала со почестиот и посериозен срцев удар. Причината во повеќето ситуации е големиот стрес како губиток на сакано лице, автомобилска несреќа, развод или прекин на врска.
Додека многумина се опоравуваат од оваа состојба, таа може да биде и фатална. Можеби најлошата вест е дека за овој синдром не постои третман на лекување, а според последната студија спроведена на Универзитетот Абердин, скршеното срце не може да се опорави само од себе, но со помош на стручно лице, напредокот е сигурен.
Синдромот на скршено срце предизвикува слични симптоми како и инфарктот, а тоа се болка во градите, отежнато дишење, аритмија и ширење на болката во левата рака. Симтомите може да се јават многу брзо по стресното случување.
КАКО ДА ЗНАЕТЕ ДАЛИ СЕ РАБОТИ ЗА ИНФАРКТ ИЛИ ЗА СКРШЕНО СРЦЕ?
“Дијагнозата се поставува со исклучување на срцев удар, со коронарографија, односно радиолошка метода на приказ на срцевите крвни садови која покажува уредни срцеви артерии со некои промени во стегањето на срцевиот мускул, како и многу благи знаци на оштетување на срцевиот мускул во лабораториските наоди кои се целосно спротивни со големината на губење на мускулната функција. Освен тоа, тука е и многу важниот податок за претходен психички и емоционален стрес“, појаснуваат кардиолозите.
Спроведувајќи го истражувањето, научниците заклучиле дека во изминатите шест месеци, бројот на оние кои го доживеале овој синдром изнесува 20, додека пред почетокот на пандемијата на ист примерок на пациенти, имало само 5 до 10 лица. Лекарите истакнуваат дека овие пациенти, кај кои не е дијагностициран КОВИД-19, подолго престојувале во болница, отколку пријавени пациенти пред почетокот на пандемијата со истата дијагноза.
