Предвременото губење за забите, кои најчесто се здрави, нелекувани и непломбирани е болест која се нарекува парадентоза. Во светот се смета дека болеста е застапена кај над 85 % од популацијата. Станува збор за хронично воспаление на потпорниот апарат на забот. Карактеристично е тоа што промените кои што се случуваат во устата при парадентоза може да се видливи или невидливи за пациентите.
Крвавењето при четкање на забите и воспалението на непцата (гингивитис) се првите знаци на болеста, кои ако не се лекуваат напредуваат долж коренот на забот уништувајќи ги влакната кои го врзуваат забот за коската. Забот почнува да се клати и на крај паѓа, а пациентот трпи болка и непријатен и лош здив.
За можни причини за појава на парадентоза се сметаат:
- Забен камен;
- Наслаги на забите создадени поради лоша орална хигиена;
- Стрес;
- Ротирани, инклинирани, како и заби со пореметување во растот и развојот;
- Лоши протетски изработки кои што можат да доведат до преоптеретување на забите и нивно предвремено испаѓање;
- Генетска предиспозиција.
За разлика од минатото, денес парадентозата се лекува со успех. Она што е најважно при третманот на оваа болест е таа навремено да се открие, додека е во почетна фаза (гингивитис) и да се третира според совет на матичниот стоматолог. Деталното чистење и полирање на забите дава одлични резултати кај навреме откриената парадентоза. Со упатства за правилна орална хигиена тогаш болеста може да се надмине. За жал, многу често првите знаци на болеста се занемаруваат па доаѓа до појава на пародонтни џебови кои бараат долготрајна и опсежна терапија.
