Во периодот на пост рибата е главна намирница во менито. Освен што е здрава, вкусна, може да се приготви на многу начини и брзо и лесно се вари. Без оглед на тоа дали сакате речна или морска риба или други морски плодови, секој вид се одликува со богатство на хранливи состојки, пред се, витамини, минерали и аминокиселини.
Туна
Исклучително богата со минералот селен и витамин А, кои играат важна улога во борбата против слободните радикали и го забавуваат стареењето.
Ослиќ
Има мала енергетска вредност и спаѓа меѓу диететските намирници – 100 г ослиќ содржат 80 отсто вода, 0,85 г масти и 17,2 белковини. Богат е со витамини Б1 и Б2, калиум, калциум и фосфор. Позитивно влијае на коските и работата на мозокот.
Сардина
Содржи магнезиум и триптофан, кои благотворно влијаат на работата на нервниот систем и го поправаат расположението, богата е со протеини, омега-3 масни киселини и калиум.
Пастрмка
Им се препорачува на дијабетичарите и личностите со висок крвен притисок. Пастрмката е нискокалорична и содржи малку натриум (40 мг во 100 Г) па штити од кардиоваскуларни тегоби.
Крап
Спаѓа во масните риби, богат е со белковини, омега-3 масни киселини, витамини А, Д и Е. Го чува срцевиот мускул и ги ублажува тегобите на болестите на крвните садови и псоријазата.
Смуѓ
Само пастрмката содржи помалку масти од смуѓот. Богат е со витамин Д, белковини, калциум, фосфор, натриум и магнезиум, а нутриционистите најчесто го препорачуваат во диети.
Лигњи
Изобилуваат со калциум, па ги зајакнуваат коските, косата и забите. Особено им се препорачуваат на децата и оние кои не ги сакаат млечните производи.
