74 % од американските педијатри се спротивставуваат на физичкото казнување на децата, објави медицинското списание „Journal of Developmental & Behavioral Pediatrics“.
Во анкетата на научниците од Универзитетот Тулан учествувале 1 500 педијатри со најмалку 15 години искуство.
78 % од нив изјавиле дека телесното казнување никогаш или многу ретко води кон подобрување на однесувањето на децата. Повеќето од нив се согласуваат дека физичкото казнување е контрапродуктивно и дека има изразени негативни последици врз децата.
„Во изминатите неколку децении излегоа огромен број на истражувања кои покажуваат дека удирањето на децата е контрапродуктивно и води кон поголема штета отколку добро“, изјавила Кетрин Тејлор, автор на новото истражување на оваа тема
„Се надевам дека педијатрите ќе препознаат дека не само што можат да зборуваат за ова прашање со родителите и еден со друг, туку и дека ја имаат поддршка од своите колеги“, додала Тејлор, вонреден професор на Универзитетот Тулан во Њу Орлеанс.
Претходните истражувања покажале дека три четвртини од мажите и две третини од жените во САД веруваат дека телесното казнување на децата може да биде корисно.
Добро познатата поговорка вели дека „ќотекот излегол од рајот“, но истражувањата кажуваат спротивно: тепањето на децата може да доведе до појава на ментални здравствени проблеми во иднина. Имено, децата кои се тепани имаат поголема веројатност да страдаат од депресија, пореметувања во расположението, фобии, зависност од дрога и други сериозни нарушувања на личноста.
Експертите објаснуваат дека дури и едноставна физичка казна може да има штетни последици. Тие се категорични дека физичката казна не само што го подобрува однесувањето на децата, туку ги прави поагресивни. Наместо „лекција“, како што мислат дел од родителите, ефектот е спротивен.
