Колку железо му треба на детето додека расте?
Во текот на животот потребите за железо се менуваат, во зависност од брзината на раст, односно од конкретните состојби, па така периодот на доење и пубертетскиот период кај здравите деца бараат највисок внес на железо.
Новороденчето ја добива резервата на железо од мајката и овие резерви се доволни за нормален раст и развој до отприлика 6. месец од животот, а потоа е неопходно да внесува железо во организмотот преку храната. Во мајчиното млеко, содржината на железо е оскудна, но неговата искористливост е максимална. Адаптираните млека се најчесто збогатени со железо.
Кај постарите деца поради недоволната количина на железо во телото, може да се појават промени на ноктите или дамки на јазикот. Исто така, анемијата доведува до слабеење на апсорпцијата и други минерали и елементи во траги, што резултира со намалена отпорност на организмот кон инфекции, особено респираторни.
Кај поголемите деца е многу честа сезонската појава на дефицит на железо, особено во рана пролет. Причината за ова е што децата во тек на зимата се почесто изложени на инфекции и настинки, а и внесот на железо од свеж зеленчук и овошје е помал отколку во другите месеци во текот на годината.
Симптоми кои укажуваат на можно присуство на анемија:
- замор;
- безволност;
- слаб апетит;
- бледа кожа;
- задишаност.
Каде го има железото? Железо во исхраната е најзастапено во месото, живината, житарки, мешункаст зеленчук, лушпи од пченица, зрна, пченични никулци, компир, жолчка, зелјест зеленчук, суво овошје, цвекло, овошни сокови, јаткасти плодови…
