За намалување на ризикот од предвремена смрт е доволно да се пешачи само пет минути на ден, утврдија научници од Америкнското здружение за онкологија.
Лицата кои одржувале минимално ниво на физичка активност умирале поретко од лицата кои оваа активност воопшто не ја правеле, пишува британскиот весник Дејли мејл.
Истражувачите ги анализирале навиките на 140 000 лица. Сите биле на средна возраст од 70 години. Тие утврдиле дека само 42 % од учесниците на возраст од 65 до 74 години и 28 % од оние на возраст од 75 и повеќе години биле доволно активни. Дури и оние учесници кои неделно се движеле под нормалата, живееле подолго од лицата кои воопшто не пешачеле.
Пешачењето, според направената студија, најмногу ја намалувало веројатноста од смрт поради респираторни заболувања. Лицата кои пешачеле по шест часа неделно без да исполнуваат никакви други активности, за 35 % поретко умирале од респираторни заболувања. Освен тоа, пешачењето го намалува и ризикот од појава на карцином за девет проценти, а кардио-васкуларните заболувања со над 20 %.
