Ноќното мокрење или ноктурија кај малите деца е вообичаена појава, но главно престанува кога децата ќе почнат да стекнуваат контрола над својот меур. Меѓутоа ако оваа состојба продолжи, тоа може да биде последица на медицинска состојба како што е инконтиненција или инфекција на уринарниот тракт, а може да биде и недијагностицирана заради бројните митови во кои веруваат родителите.
Најчестите проблеми кои можат да предизвикаат мокрење во креветот се доцнење во развојот на рефлексот на бешиката, ниското ниво на антидиуретски хормон кој го забавува производството на урина навечер, доцнење во развојот на бешиката, инфекција на уринарниот тракт, но и запек.
Ова се најчестите митови за мокрењето во кревет:
Децата мократ затоа што не се научени да одат во тоалет
Мокрењето во кревет не е знак дека детето не е обучено за одење во тоалет. Детето може да биде совршено способно да ја контролира својата бешика во текот на денот, но и понатаму мокри в кревет ноќе.
Треба да се чека за решение на проблемот
Многу родители претпоставуваат дека нивните деца мократ во кревет затоа што едноставно се уште немаат потполна контрола над својот меур и дека мора да се почека. Иако тоа е чест случај, не е секогаш точно. Според студијата која ја направил Универзитетот во Бристол, постојат неколку фактори кои можат да предизвикаат мокрење во кревет и во подоцнежна фаза, каде „пристапот на гледање и чекање“ можеби нема да биде успешен. Всушност тоа може да го прикрие медицинскиот проблем во основа како што е неисправен механизам на бешика или инфекција на уринарниот тракт. Студијата, исто така, навела дека многу родители сметаат оти третманите за мокрење во рана фаза не се потребни и дека треба да се чека на решение на проблемот, што, според мислењето на стручњаците, е лош пристап и има негативен ефект врз квалитетот на живот на детето.
Децата кои имаат ноктурија се едноставно мрзеливи
Овој поглед може да биде исклучително штетен за децата. Децата намерно не мократ во кревет и може да се чувствуваат посрамено ако родителот избере да ги казни заради тоа. Важно е да се увери детето дека не е виновно и да се земат предвид и другите можни причини.
Мокрење во кревет е секогаш поврзано со емоционален стрес
Иако емоционалниот стрес може да се поврзе со мокрењето во кревет кај децата тоа не е секогаш причина. Поголема е веројатноста да станува збор за доцнење во развојот на бешиката.
На вашето дете му се потребни лекови
Иако постојат некои случаи кога се препишуваат лекови за мокрење во кревет, тоа секогаш би требало да биде последната опција. Доколку мислите дека мокрењето во кревет на вашето дете би можело да биде предизвикано од медицинска состојба, важно е да се посети лекар.
