Ракот на панкреас е на високото четврто место помеѓу причините за смрт од малигни болести. Тешко е да се утврди во ран стадиум кога е без симптоми, а едноставни тестови кои можат широко да се применат, за жал, нема.
Според податоците на Националниот американски институт за карцином, само два проценти од луѓето ќе добијат навремена дијагноза на рак на панкреас, а најчесто се јавува кај лица над 60-годишна возраст, иако е забележена појавност и кај лица помлади од 30 години.
Кога станува збор за овој карцином кој има една од најголемите стапки на смртност, превенцијата и раната дијагноза се најважни.
Зошто е тешко да се открие во рана фаза?
Причината е положбата на овој орган кој се наоѓа на такво место што е тешко да се открие со случаен преглед, а симптомите се такви што луѓето често ги игнорираат. Бидејќи е важно да се знаат, ова се неколку важни симптоми на кои предупредуваат гастроентеролозите.
Жолти очи и кожа
Ова може да бидат симптоми на проблеми поврзани со алкохолизам, откажување на црниот дроб или рак на панкреасот, бидејќи поголемиот број тумори на панкреасот прво се развиваат на горниот дел од органот, па така може да го блокираат жолчниот канал. Без разлика на причините, овие симптоми не смеат да се игнорираат.
Подуеност
Доколку се почувствува подуеност по обилен оброк, тогаш нема причина за вознемиреност, но ако подуеноста остане присутна неколку дена, тоа веќе е алармирачки сигнал. Ова е еден од првите симптоми кои жените го забележуваат, но не се обраќаат за стручна помош, верувајќи дека ќе помине. Не треба веднаш да се помисли на рак, но не е на одмет и лекарска консултација.
Немање апетит
Губењето на апетитот е уште еден од важните симптоми на рак на панкреасот. Како туморот расте така притиска на останатите органи, а може да му пречи и на желудникот. Резултатот е чувство на слабост и прејадување и покрај фактот дека сте консумирале малку храна.
Губење килограми
Губењето на апетит може да доведе до забрзано намалување на килограмите, а ако тоа како појава не можете сами себе да си го објасните, тогаш побарајте лекарска помош.
Болка во долниот дел на грбот
Овој тумор не само што предизвикува проблеми со желудникот, туку може да притиска и на останатите делови на телото како ‘рбетот и мускулите што го опкружуваат. Доколку болката е постојана, секако, мора да се консултирате со стручно лице.
