Рокер во душа, актер по професија, вљубеник во спортот… токму тоа е Петар Георгиевски – Камиказа или едноставно Перо Камиказа – човекот кој е најистурениот играч на легендарниот состав Меморија, оној кој најмногу љуби да зборува. Оние кои не знаат со што уште се занимава Перо сега сигурно се прашуваат зошто токму тој има место меѓу редовите посветени на здравјето?!
Заради својот неуморен и нескротлив дух, затоа што е „навлечен“ маратонец, затоа што многу внимава на исхраната, затоа што ја љуби природата… Веројатно, сето ова е сосема доволно за тој да го оправда своето присуство на Panacea.mk…
Кога ќе спомене музика, рок, гитара… асоцијацијата за личноста која е главен лик во приказната е нездрав начин на живот, пороци…, но Вие сте чиста спротивност на сето ова. Водите здрав живот, спортувате, постојано сте во теретана, а тука е и трчањето…
Перо Камиказа: Во Меморија најјак порок од се што спомена е пивото кое го испивме во пристојно количество, за пробите. Другите пороци поврзани со „релаксација и задоволство“ се непознатица во бендот ха, ха, ха… Што се однесува до мене, точно е дека вежбам во теретана три пати неделно. Четири пати неделно трчам, и тоа еднаш на Водно. Тоа би бил отприлика тој „фенси“ начин на живеење.
Каков е Вашиот дневен ритуал, во смисла на тоа како Ви почнува еден ден, во кој дел од денот му се посветувате на спортот?
Перо Камиказа: Обично од овој месец регуларно секое сабајле на кеј трчање, а попладне во деновите определени за тоа – теретана. Се ближат полумаратоните во Мадрид, „Трчаме кон целта“, како и главниот „Скопски маратон“ на кој оваа година заедно со Баже ќе бидеме пејсмејкери на време од 01:59:00/мин.
Уживам да јадам овошје и зеленчук во неограничени количини, а и по некој сладолед
Дали и колку внимавате на исхраната?
Перо Камиказа: Се зависи од периодот во годината, на пример, во ноември, декември, јануари јадам се што не сум јадел во текот на останатите 9 месеци (сланина, чварки, сарми, многу јајца, урда, слатки, пици, итн.) Во моментов сум на пост. Значи, нема ништо од ова горенаведеното, туку напротив се спротивно од претходното. Инаку, напролет и налето уживам да јадам овошје и зеленчук во неограничени количини, а и по некој сладолед ха, ха, ха…
Маратоните се Ваша љубов, пасија… што досега го сметате за свој најголем подвиг, успех на ова поле?
Перо Камиказа: Сите што сум ги истрчал се извонреден успех на себенадминување, но би ги издвоил маратоните во Рим и Њујорк како нешто што ќе го паметам до крајот на животот. Но има уште многу други кои ќе треба да ги завршам. Но за тоа во друга прилика…
Ова што го правам воопшто не го сметам за „ригорозно“, туку го сметам за култура и начин на живеење.
Повеќето од Вашите врсници имаат „пивски стомачиња“, најголем физички напор им е држењето на мобилниот телефон, а Вие по социјалните мрежи се фалите со „плочки“ на стомакот. Што беше пресудно да станете ригорозни кон себе, со оглед на тоа дека во одреден период од животот бевте на добар пат да се придружите на мнозинството?
Перо Камиказа: Сум бил со стомак само 4 години така што ако ништо друго барем знам како им е на тие со стомаците. Ова што го правам воопшто не го сметам за „ригорозно“, туку го сметам за култура и начин на живеење. А тоа со „тоблеронето“ е мала шега ха, ха, ха…
Дали постот кој го практикувате го сметате повеќе за духовно или физичко прочистување?
Перо Камиказа: И двете. Бидејќи навистина едното без другото нема никаква смисла.
Уште една Ваша пасија се и моторите – мирисот на гуми и асфалт често го менувате со незаборавни пејзажи… но за да се поминат илјадниците километри на ѕвер на две тркала потребна е кондиција, можеби одредена исхрана… Што всушност правите кога сте во ваква авантура?
Перо Камиказа: Возам со пријателите од мотоклубот „Букефал“. Уживам во запознавањето на нови луѓе и предели. Точно е дека треба да бидеш многу концентриран бидејќи ние возиме доста долги рути од над 1 000 км на ден, како што беше случајот и со Норд Кап ланската година. Оваа година на репертоар ќе биде Кападокија во мај, веднаш после „Скопски маратон“ и, се разбира, „ФИМ“ релито во Латвија. Инаку, кога е во прашање исхраната генерално не правам ништо посебно во тој период, туку само го практикувам она што и вообичаено. Повеќе овошје, зеленчук и течности.
И за крај, постои ли некој таен рецепт, ритуал кој го практикувате, а кој е Вашиот сојузник за добро здравје?
Перо Камиказа: Да помагаш секогаш кога можеш. Да не очекуваш никогаш да ти се врати. Да го сакаш животот и да веруваш во Бога затоа што си еден од ретките кој имал шанса да го види светлото на денот и сите благодати кои може да ги даде овоземскиот свет. И сосема за крај, да сакаш и да бидеш сакан.
Александра Тимковска
aleksandra@panacea.mk
