Можеби и нема да ве изненади податокот дека чајот е толку популарен напиток и дека ширум светот во секоја секунда се испиваат околу 25 000 шолји чај. Но она што би можело да изненади е дека новите истражувања покажуваат оти овој напиток не би требало да го пиете врел затоа што со тоа се зголемува ризикот од заболување од рак на хранопроводот. Новата студија се фокусирала на навиките на испивање чај на 50 000 Иранци, на возраст од 40 до 75 години. Ова истражување ги потврдило претходните сознанија дека врелиот чај го зголемува ризикот од рак на хранопроводот.
Примарните фактори на ризик за оваа опасна болест се пушењето и алкохолот, но Американското здружение за рак истакнува дека консумирањето врели напитоци го зголемува бројот на сквамозни клетки кои се одговорни за овој вид рак. Стручњаците велат дека тоа потенцијално настанува како резултат на долготрајни оштетувања на клетките предизвикани од врелите напитоци.
Во најновата студија температурата на чајот е мерена објективно (вистинската температура на течноста) и субјективно (температурата на чајот која најмногу и одговара на личноста). За време на оваа студија дијагностицирани биле 317 случаи на карцином на хранопроводот. Во споредба со учесниците кои пиеле околу две шолји чај со пониска температура, личностите кои пиеле повеќе од две шолји чај дневно, со температура повисока од 60 Целзиусови степени, имале за 90 отсто зголемен ризик од рак на хранопроводот.
„Според нашите извештаи пиењето мошне врел чај го зголемува ризикот од канцер на хранопроводот, па препорачливо е да се почека напитокот малку да се излади пред консумирање“, вели водечкиот автор на студијата доктор Фарад Ислами.
Со оглед на тоа дека чајот е втор најпопуларен напиток во светот, после водата, овие податоци и тоа како треба да се знаат и да се имаат предвид. Иако, секако, се истакнува дека врелиот чај ни случајно не е причина за рак на хранопроводот – и други фактори, вклучително и генетиката и факторите од опкружувањето го зголемуваат ризикот, но сепак е препорачливо да внимавате на температурата.
Исто така, професорот по орално и дентално здравје, д-р Бинг Ху, истакнува дека ова откритие лесно може да се „рашири“ и на другите напитоци, односно на сите течности кои се консумираат врели.
„Добро е познато дека температурите повисоки од 60 Целзиусови степени се штетни за кератиноцитите кои произведуваат кератин, важен протеин од кого е составен надворешниот дел о кожата“, истакнува тој.
