’Sour’ или киселкастите коктели се добиваат со мешање на алкохол, сок од лимон, шеќер во прав и јајца (белки), а се мошне популарни меѓу припадниците на помладата генерација. Вкусни се и имаат специфична арома, но експертите предупредуваат дека ваквите пијалаци се потенцијална опасност по здравјето затоа што може да предизвикаат труење.
Причината се свежите јајца кои во себе може да имаат салмонела – опасна бактерија која ги напаѓа цревата, а во некои случаеви може да предизвика и компликации кои се опасни по живот доколку инфекцијата се прошири надвор од цревата. Токму затоа, експертите предупредуваат дека популарниот пијалак со јајца треба внимателно да се приготвува и притоа да се испочитува едно многу важно правило. Имено, важно е девет минути да оставите алкохолот, сокот од лимон и јајцата да отстојат за да се поврзат. Ова време е доволно за да се уништат бактериите и со самото тоа коктелот да биде безбеден за консумирање, тврдат научниците.
„За да бидете сигурни дека напитокот е сигурен за пиење, препораката е свежата белка да се остави да отстои во алкохол и лимон најмалку девет минути пред сервирање“, рекла Стефани Лопс, експерт за исхрана.
Салмонелата вообичаено се јавува како резултат на консумирање сирово или недоволно зготвено месо, јајца или производи од јајца. Инкубацискиот период варира од неколку часа до два дена. Поголемиот дел од инфекциите со салмонела можат да се класифицираат како гастроентеритис.
Вообичаено луѓето кои се заразени од салмонела имаат дијареја, грозница и стомачни грчеви во период од 72 часа од консумирањето на заразените намирници.
