Пивскиот квасец освен во производството на пиво се користи и како прехранбен суплемент. Неодамна е откриено дека пивскиот квасец во организмот се однесува многу слично на пробиотиците.
Тој е богат со протеини (52 %), а претставува и добар извор на селен, хром и витамин Б6, поради што стана популарен како додаток на исхрана.
Едно неодамнешно истражување на научници од Бангладеш го споредило делувањето на пивскиот квасец во организмот со дејството на пробиотиците и утврдено е дека поседува слични особини: го апсорбира холестеролот, произведува витамин Б12, глутатион, сидерофор, органска киселина и силен биофилм. Освен тоа, има способност за автоагрегација и површинско одбивање на водата, што се суштински својства на пробиотикот. Пивскиот квасец може да произведе ензими како што се амилаза, протеаза и липаза кои ја подобруваат апсорпцијата на нутриентите во цревата. Исто така, покажува антибактериска активност против грам-негативните бактерии.
Пивскиот квасец може значајно да придонесе во регулирањето на нивото на шеќер во крвта. Познато е дека хромот учествува во регулацијата на нивото на шеќер во организмот, а пивскиот квасец содржи хром во многу квалитетен и лесно апсорбирачки облик.
Истражувањето објавено во списанието Journal of Trace Elements in Medicine and Biology утврдило дека учесниците во него кои во текот на 40 дена земале по девет грама пивски квасец дневно во просек го намалиле нивото на шеќерот во крвта пред оброк за 42 %, што е значаен резултат. Покрај тоа кај нив е забележано и намалување од 17 % на ЛДЛ, односно лошиот холестерол.
