Есента е на прагот и многумина од нас размислуваат дека е време да му се вратат на вежбањето за телото да им остане во добра форма. Но место да се потиме во теретана, зошто не продолжиме со она што повеќе или помалку сме го правеле цело лето – пливање!
Пливањето не помага само за обликувањето на телото, туку и на сите функции на организмот, па доволно е само два до три пати неделно да се појде на базен и да се почувствуваат бенефитите.
Оние кои пливаат редовно знаат колку овој базичен спорт ја јакне целата мускулатура, но и срцето и белите дробови. Без оглед на тоа за кој стил ќе се одлучите, со пливањето ќе ја подобрите густината на коските, но и тонусот на мускулите. Ќе ја зголемите и подвижноста и еластичноста на зглобовите. Пливањето е единствено и по тоа што речиси и да не постои можност за повреди!
Нема полесен начин за слабеење од пливањето, со оглед на тоа дека на овој начин се трошат минимум 400 калории за еден час. Ќе го намалите и ризикот од дијабетес, ќе го зголемите капацитетот на белите дробови, ќе го ублажите стресот… Сите овие и уште низа други погодности од пливањето се потврдени во истражувањето спроведено на универзитетот во Сиднеј, во кое учествувале дури 4 800 пливачи чија здравствена состојба била следена две години во континуитет. Резултатите се импресивни: 98 проценти значително ги подобриле повеќето функции, додека преостанатите имале нешто послаб учинок, но интересно е дека никој не поминал без барем еден корисен ефект. Рецепт за среќа можеби нема, но кога е здравјето во прашање јасно е дека пливањето е една од неговите најважни состојки.
