Областите на човечкиот мозок одговорни за меморија и учење престануваат да произведуваат неврони околу тринаесеттата година од животот, покажаа резултатите од неодамнешното истражување на американските и шпанските научници.
Откритието го доведува во прашање досега познатиот став според кој хипокампусот продолжува да произведува неврони, важни за пренос на информациите во мозокот, се додека човекот не стане возрасен.
Резултатите несомнено ќе поттикнат полемики
Претходните истражувања сугерираа на тоа дека секојдневно во човечкиот хипокампус се произведуваат по стотина неврони. Се веруваше и дека со поттикнување на неврогенезата (формирање на невроните во зрело доба) може да се делува против разни невродегенеративни болести кои се развиваат кај постарите лица.
„Проучувајќи го мозокот на 59 возрасни лица и деца, заклучивме дека нема докази за постоење на млади неврони или матични клетки кои произведуваат нови неврони во хипокампусот на лица постари од 18 години“, вели коавторот на студијата од Универзитетот Калифорнија, Артуро Алварез Буила.
„Најдовме одреден број на неврони кај деца до една година и уште нешто кај деца на возраст од седум до 13 години“, додаде научникот. „Резултатите од нашето истражување сугерираат дека хипокампусот кај луѓето во голема мера е веќе изграден за време на развојот на мозокот на фетусот“, додава тој.
Научниците откриле нови неврони во некои други делови на мозокот, поточно во мозочните клетки. Велат дека треба да спроведат дополнителни истражувања на други делови од мозокот за да дознаат дали се одвива неврогенеза.
„Резултатите несомнено ќе поттикнат полемики“, изјавил за магазинот „Nature“ неврологот Џејсон Снајдер од Универзитетот Бритиш Колумбија.
