Ракот на дојка го претекна ракот на бели дробови, како најчеста форма на карцином во светот, објави завчера Светската здравствена организација (СЗО).
“Ракот на дојка сега по прв пат е најчест рак во светот“, изјави Андре Илбаи, специјалист за карциноми при СЗО, по повод Светскиот ден за борба против ракот, кој се одбележува денес.
Ракот на бели дробови беше најчестата форма на рак во изминативе 20 години, но сега е на второ место, зад ракот на дојка и пред ракот на дебело црево, истакна Илбаи.
Се проценува дека минатата година се дијагностицирани 2,3 милиони нови случаи на рак на дојка, што е 11,7 проценти од сите случаи на карциноми во светот, соопшти СЗО.
“Меѓу жените, ракот на дојка е најчесто дијагностицираниот карцином и водечка причина за смртност од рак во светот“, додаваат од СЗО.
Илбаи истакнува дека дебелината кај жените го зголемува ризикот за развој на рак на дојка, но и за вкупниот број на случаи на карцином.
Со порастот на глобалната популација и оечкуваното зголемување на животниот век, се очекува карциномите да станат се почести и до 2040. година ќе се зголемат на околу 30 милиони нови случаи во однос на 19,3 милиони во 2020., додава Илбаи.
СЗО предупредува дека една третина од смртните случаи од рак се последица од пушењето цигари, високиот индекс на телесна маса, премалиот внес на овошје и зеленчук, недостаток на физичка активност и консумирање алкохол.
