По кратко и тешко боледување на 62-годишна возраст, вчера почина новинарот Ристе Недановски.
Со своето 30-годишно искуство, Недановски како новинар од областа на здравството остави траен белег во македонското новинарство, како постојан заштитник на правата на пациентите и информирајќи за актуелните состојби во медицината во земјава.
Тој како новинар од 1991. почнува да работи во весникот “Вечер”, за шест години подоцна стане дела од редакцијата на весникот “Дневник”, а во 1999. станува заменик-уредник на економската рубрика и новинар за здравство во “Утрински весник”. Од 2004 година е уредник и новинар за здравство во редакцијата “Вечер”.
Од активното новинарство се повлекува во 2006 година кога работи како PR менаџер во “Публицист” – Скопје, од 2009 год. е извршен директор и PR менаџер во “Концепт маркетинг”.
Во 2011. станува главен уредник на весникот на Лекарската комора на Република Северна Македонија – Vox Medici, каде работеше до крајот на својот животен век.
Долги години подготвуваше и уредуваше текстови, посебни тематски публикации и инфо-гласила на различни асоцијации, здруженија, организации и компании. Во својот професионален ангажман се истакнува како исклучителен познавач на здравствениот систем во Република Северна Македонија, и учествуваше во подготовка на повеќе релевантни меѓународни анализи за состојбите и реформите во здравството.
Во насловот, не е згрешено презимето на Ристе. Јас и сите колеги кои години наназад покриваат здравство ја знаеме анегдотата за неговото “второ“ презиме Најденовски. Како еден познат професор години и години наместо Недановски му се обраќаше со Најденовски. Недановски или Најденовски… Сеедно, Ристе ќе остане мојот другар и пријател “Ристе што не старее, професор Најденовски“.
До следното видување, Ристаки!
