Од вчера, и официјално почна таргетираниот скрининг на одредени критични категории на пациенти за КОВИД-19. Според министерот за здравство, Венко Филипче процесот ќе почне со тестирање на вработени во градинките, со цел да се изготви протокол за работа и конечно отворање на овие установи.
„ Сметаме дека е ова најдобриот пристап, затоа што контактите и на тие несвесни носители на вирусот ќе бидеме во можност да ги ставиме во изолација. Затоа и го крстивме таргетиран скрининг.“, изјави министерот Филипче.
За таа цел, во земјава се отворени пунктови за земање брисови од пациенти кои се упатени од матични лекари по претходен скрининг за КОВИД-19 во просториите на Центрите за јавно здравје и нивните подрачни единици.
Во Скопје пунктови се отворени во сите поликлиники во рамките на ЈЗУ Здравствен дом – Скопје.
Таргетираниот скрининг за вработените во градинките се спроведува по посебен протокол и со земање на брисеви во пунктовите со веќе дефинирано работното време од 08.00 до 14.00 часот.
Закажувањето на земање на брис за вработени во градинки се врши преку договор помеѓу надлежниот Центар за јавно здравје или Подрачна единица од територијата на соодветниот ЦЈЗ/ПЕ. Распоредот за земање на брисеви по денови е согласно табеларен распоред. Се применува Протокол за земање на биолошки материјал (брис) од пунктови за скрининг на лица во ризик од КОВИД-19 во однос на користење на ЛЗО и земање на биолошки материјал.
Истовремено, Центарот за јавно здравје и Институтот за јавно здравје изготвија план за скрининг и на лица за кои се смета дека се во критична категорија. Во овој скрининг ќе бидат тестирани здравствени работници, вработени во градинки, вработени во домови за згрижувањена стари лица, пациенти со хронични болести кои беа одложувани, пациенти на биолошка терапија.
Скринингот ќе се прави со ПСР тестови, а целта на тестирањето е да се идентификуваат асимптоматските носители на вирусот – односно луѓе кои се заразени, а не се свесни поради тоа што немаат симптоми.
“Со оваа стратегија, ќе се овозможи поквалитетна проценка за можноста за олабавување на рестриктивните мерки, но и значително зголемување на бројот на тестови“, нагласи ресорниот министер.
