Неспорен е фактот дека правилната и избалансирана исхрана е најдобриот начин да ги зачувате ноктите здрави, силни и сјајни. Токму внесувањето на одредени хранливи материи има неизоставна улога во одржувањето на здравјето на ноктитеа.
Протеини
Интересно е што нашите нокти првенствено се изградени од кератин. Овој структурен протеин е заслужен за цврстината и еластичноста на ноктите, но исто така и ги штити од оштетувања и стрес.
Исхраната која вклучува намирници богати со протеини, како што се месото, живината, рибата, јајцата, млечните производи, но и сојата, мешунките, оревите и житарките со цели зрна помагаат во производството на кератин, а со тоа и во изградба на цврсти нокти.
Омега-3 масни киселини
Со цел да се спречи сушењето и оштетувањето на ноктите, од голема помош може да биде консумирањето на храна богата со омега-3 масни киселини, како што е риба, морска храна, јаткасти плодови и семиња. Омега-3 масните киселини, имено, ги „подмачкуваат“ ноктите и им даваат здрав сјај.
Витамини од Б-група
Биотинот може да се смета за еден од најважните витамини за здравјето на ноктите. Овој витамин е вклучен во метаболизмот на аминокиселините, кои имаат суштинска улога во нивниот раст. Резултатите од студијата во која биле вклучени 35 испитаници покажале дека земањето на 2,5 мг биотин (како додаток) дневно за шест недели ги подобрило симптомите на скршени нокти кај 63 % од испитаниците.
Покрај биотинот треба да се спомене и витаминот Б12 и фолна киселина кои имаат важна улога во производството на еритроцити и пренос на кислород до клетките на ноктите.
Витамин Ц
Производството на колаген, протеин важен за растот на силни нокти, е незамисливо без витамин Ц, а докажано е дека недостатокот на овој есенцијален нутриент може да го успори растот на ноктите. Пиперките, агрумите, јагодите и зелениот зеленчук се ризница на витамин Ц.
Цинк
Интересно е што ноктите ги градат клетки кои се делат и растат со голема брзина. Токму поради брзата поделба и раст на клетките, во телото е потребна адекватна резерва на цинк.
Од друга страна, недоволното внесување на цинк може да резултира со дегенерација и појава на специфични бели дамки на ноктите
Цинкот го има во намирници како што се риба, морски плодови, јајца, но и јаткасти плодови и семиња.
Железо
Јоните на железото се наоѓаат во центарот на црвените крвни клетки кои го пренесуваат кислородот до секоја клетка во нашето тело. Кислородот е од суштинско значење за здравјето на ноктите, а недостатокот на железо во телото може да предизвика појава на вертикални бразди на ноктите.
Нашето тело најдобро може да го користи железото од намирниците од животинско потекло, како што се црвено месо, живина, риба и јајца. Меѓутоа, железото го има и во намирници од растително потекло, како што се лиснатиот зеленчук, житарките и мешунките. Овие намирници се препорачуваат во комбинација со храна богата со витамин Ц за да се подобри апсорпцијата на железо.
