Повеќето од нас слушнале совет кој звучи контрадикторно: со прескокнување на појадокот може да се здебелите, бидејќи тоа го забавува метаболизмот и ве тера во текот на денот да јадете повеќе.
Ако ова ви се чини дека е бесмислено, можеби и сте во право. Нема докази дека прескокнувањето на појадокот доведува до зголемување на телесната тежина, стои во најновата студија објавена во научното списание British Medical Journal.
Спротивно на врежаното верување, истражувањето покажало дека, ако не појадувате тоа нема да предизвика чувство на зголемен глад во попладневните часови или разлика во потрошувачката на енергија. Научниците од Универзитетот Монаш во Мелбурн ја анализирале врската на појадокот со промената на телесната тежина и дневниот внес на енергија.
Тие користеле податоци од 13 клинички истражувања спроведени во САД и во Велика Британија во последните 28 години. Утврдиле дека вкупниот дневен внес на енергија бил поголем кај лицата кои појадувале, отколку кај оние кои не појадувале (во просек 260 калории), без разлика на тоа дали вообичаено појадуваат или не. Истовремено утврдиле и дека помеѓу едните и другите нема значајни разлики во активностите на метаболизмот.
“Иако редовното појадување може да има други битни ефекти, треба да се биде внимателен кога појадокот се советува заради намалување на телесната тежина, бидејќи може да има сосема поинаков ефект“, се наведува во студијата.
Но, тоа не значи дека треба да се “давиме“ во јајца и во сланина – научниците имено потенцираат дека квалитетот на страите истражувања е многу лош, па заклучоците треба да се земаат со внимание.
