Лимфоцитите се најмалите клетки во крвта кои имаат одбранбена улога. Произведуваат антитела и дел се од леукоцитите (белите крвни зрнца). Леукоцитите (белите крвни зрнца) го штитат телото од микроорганизмите (вируси, бактерии и сл.). Лимфоцитите имаат клучна улога во одговорот на организмот на нападот на микроорганизмите и се составен дел од имунолошкиот систем. Исто така, помагаат во заштитата на организмот од тумори. Меѓутоа лимфоцитите можат, исто така, да предизвикаат отфрлување на ткивата за време на трансплантација на органите затоа што на тие ткиваат гледаат како на туѓа опасност.
Покачени лимфоцити
Постојат многу можни причини за преголемо количество лимфоцити. Нивото на лимфоцити над 40 % е абнормално високо. Некои основни причини се грип и варичела. Останатите вклучуваат туберкулоза, херпес, рубеола, магарешка кашлица…
Некои од наведените состојби:
- Туберкулоза е тип на инфекција која обично ги зафаќа белите дробови;
- Рубеола е тип на вирусна инфекција која може да ги зафати и децата и возрасните;
- Магарешка кашлица е тип на инфекција која предизвикува кашлање и шум при дишење;
- Херпесот е вирус кој обично предизвикува симптоми на грип и настинка;
- Акутна лимфобластна леукемија (АЛЛ) и хронична лимфоцитна леукемија предизвикуваат раст на бројот на лимфоцити; Леукемијата е тешка болест (тумор или рак) во која „лошите“ крвотворни (хематопоетски) клетки се наоѓаат во коскената срж и/или во крвта. АЛЛ е тип на леукемија кај која има премногу незрели бели крвни клетки кои се произведени од страна на коскената срж. ЦЛЛ е тип на леукемија која се карактеризира како присутност на преголемо количество зрели лимфоцити.
- Ракот е всушност збир од болести кај кои симптомите се појавуваат заради абнормален и прекумерен раст на клетките во еден од органите или ткивата на телото.
- Други стостојби кои можат да предизвикаат преголемо количество лимфоцити се мононуклеозата, хепатитисот и токсоплазмозата.
- Мононуклеозата е вирусна инфекција која се појавува ненадејно и која е карактеристична по големиот пораст на бројот на леукоцити.
- Хепатитис, станува збор за воспалителна болест на црниот дроб. Задачите на црниот дроб се бројни, клучна е метаболната улога на црниот дроб, односно одржувањето на нивото на глукоза во крвта, синтезата на протеините во плазмата и сл.
- Токсоплазмоза е тип на инфекција на птиците, рептилите и други животни, која, исто така, може да се појави и кај луѓето.
Одредени лекови, исто така, можат да доведат до големо количество лимфоцити. Освен сето ова зголемен број лимфоцити може да се јави и после трансфузија на крв.
Намалени лимфоцити
Постојат многу можни причини за премало количество (помало од 15 %) на лимфоцити. Бидејќи лимфоцитите се произведуваат во коскената срж недостатокот на лимфоцити може да се случи при непримерен развој на коскената срж или нејзина намалена активност.
Апластична анемија настанува затоа што коскената срж не е во можност да ги произведува сите видови крвни клетки.
Вирусот на ХИВ примарно ги напаѓа лимфоцитите и го намалува нивниот број. Луѓето со АИДС често имаат недостаток на лимфоцити во крвта.
Освен сето наведено постојат уште неколку работи кои можат да предизвикаат намалување на лимфоцитите, на пример, стероидите. Стероидите се збир од хормони со слична хемиска структура.
Хормоните всушност пренесуваат пораки во телото од една клетка до друга, преку посебен облик на хемиско делување. Заслужни се за регулирањето на разни физиолошки процеси како раст и развој, метаболизам и делување на расположението и сл.
Некои пореметувања кои ги зафаќаат нервите, исто така, можат да предизвикаат намалено ниво на лимфоцити, пример, мултиплекс склероза, миастенија гравис и Гиен-Бареов синдром.
- Мултипла склероза е состојба кај која луѓето развиваат повеќе склерози во мозокот или ’рбетниот мозок (зависно од степенот на развиеност на болеста).
- Миастенија гравис е вид на пореметување кај кое мускулите слабеат и брзо се изморуваат.
- Гиен-Бареов синдром е ретко пореметување кое предизвикува слабост во рацете и нозете заради оштетување на нервите.
КАКО ДА СЕ РЕГУЛИРААТ ЛЕУКОЦИТИТЕ?
Леукоцитите односно лимфоцитите сами по себе не се болест, туку упатуваат на болест, односно абнормална телесна реакција на некој воспалителен процес. За на кој било начин да може да се регулира бројот на бели крвни зрнца во организмот, потребно е, пред се, да се обават прегледи и анализи, за воопшто да се утврди нивната вредност. Значи, се лекува, пред се, причината на покачено, односно намалено ниво на леукоцити во крвта, а дури потоа се преминува на алтернативни методи.
Ако причината е воспаление, лекарот ќе препише антивоспалителен лек. Ако се причина бактериски инфекции, ќе помогнат антибиотиците, а ако е леукоцитозата поврзана со алергии, предвид доаѓаат антихистаминици.
