Истражувачите во Јапонија ја мереле должината на чекорите на мажите, како и тоа колку ги поткревале нозете од подлогата додека оделе. Мажите со пократки чекори, според резултатите од истражувањето во поголема мера се бореле со импотенција. Истражувачите веруваат дека силината на мускулите во кралицата игра важна улога за еректилната функционалност.
„Веруваме дека слабите карлични мускули можат да предизвикаат тешкотии со ерекцијата, но и кратки чекори“, рекол главниот автор на студијата, доктор Шинго Хатакејама од Универзитетот Хиросаки.
Студијата во која се анализирани 324 мажи е објавена во Journal of Sexual Medicine. Со анализата се утврдувала должината на двочекорот во сантиметри. Така добиената вредност на научниците им го претставила нивото на рамнотежа, прилагодливост на мускулите и силата на мускулите во нозете кај мажите. Мажите со мали чекори имале просечен резултат од 153 сантиметри, а оние со големи чекори просечен резултат од 166 сантиметри. Сантиметрите се претворени во индекс на еректилна дисфункција. Резултатите од 22 до 25 покажуваат дека нема еректилна дисфункција, додека индексот од 5 до 7 означува сериозна еректилна дисфункција.
Истражувачите ги поделиле мажите во две групи – оние со резултат помал од 16 и оние со резултат поголем од 16.
„Чекорењето може да биде во корелација со силата и либидото, а со самото тоа и со тестостеронот кој е важен за сексуалната функција“, рекол професорот Рај Персад од Здружението на уролози од Бристол.
Еректилната дисфункција или импотенцијата е дефинирана како неможност за постигнување или одржување на ерекција соодветна за сексуално задоволство. Често е предизвикана со стрес, умор, анксиозност или често консумирање алкохол и може да се излекува. Утврдено е дека намалената физичка активност претставува фактор на ризик за еректилна дисфункција, а студиите покажале дека оние кои вежбаат имаат помала веројатност еден ден да имаат проблем со импотенција.
