Носните полипи се бенигни, безболни и меки гроздести израстоци кои може да се појават на било кое место на слузницата во носната шуплина и параназалните синуси. Најчесто причина за носната полипоза се инфекции, алергии, астма, преосетливост на лекови или имунолошки заболувања. Се појавуваат поединечно или во група, а наликуваат на мали гроздови. Знаци за заболувањето се хронична кивавица и затнување на носот. Лицата кои имаат носни полипи дишат на уста и зборуваат низ нос. Полипите може да предизвикаат намалување на квалитетот на живот, бидејќи предизвикуваат постојана носна опструкција и може да доведат до значајно слабеење на осетот на мирис.
СИМПТОМИ
Први симптоми на полипите се затнат нос, поради кое дишењето е отежнато или целосно оневозможено. Поради таа механичка опструкција на носот, се јавува повремено или целосно губење на осетот за мирис. Се појавува и секрет од носот кој варира од редок и безбоен, до густ и гноен. Од симптомите може да бидат присутни и: солзење на очите, главоболка, сувост на устата, “рчење и говор низ нос. Поради затнатост на параназалните синуси, се појавува и хроничен синузитис.
Најчести симптоми се: засилена носна секреција, постојана затнатост на носот, слевање на секрет во грлото, намалување и губење на осетот за мирис, чувство на тежина во челото и на лицето, главоболка, болки во пределот на лицето, крчење при спиење и сл.
Носната полипоза е често заболување кое се јавува кај 1-4 % од населението, со тенденција на пораст.
Носната полипоза може да доведе до сериозни компликации оти го оневозможува нормалното дишење на нос и дренажата на секретот од носот и синусите. Потенцијалните компликации вклучуваат тешкотии со дишењето во тек на спиење, астматични напади, гнојни воспаленија на синусите кои поради оневозможената дренажа лесно се прошируваат кон очите и може да го загрозат видот, па дури и да доведат до воспаление на мозочните обвивки.
