Лицата кои се опоравиле од КОВИД-19, а дека се заразени воопшто и не знаеле бидејќи не почувствувале, ниту покажале некакви симптоми, се една од најголемите мистерии кои ја следат оваа пандемија предизвикана со ширење на коронавирусот.
Додека не се открие барем приближниот број на асимптоматски пациенти, велат научниците, ќе биде тешко да се знае како тие придонесуваат за ширење на вирусот и дали развиле антитела или друга заштита, која на имунитетот би му овозможила да се бори против инфекцијата.
“Ние навистина не знаеме многу за оваа болест. Знаеме нешто повеќе од она од пред три месеци, но се уште има многу работи на кои немаме одговори“, вели пулмологот Џорге Меркадо, професор на Универзитетот во Њујорк.
Вистинскиот број на заразени е една од оние “работи“ без одговор. Американскиот центар за контрола и превенција на болести дошол до заклучок дека бројот на заболени во нивната земја може да се десеткратно поголем од пријавениот. Тоа значи дека од КОВИД-19 заболеле дури 23 милиони Американци.
На почетокот, многу асимптоматски случаи минуваа незабележано поради хроничниот недостаток на тестови и друга опрема, поради што се тестираа само најзагрозените и оние кои видливо биле болни. Многи заболени бес јасни симптоми не знаеле дали биле позитивни.
Долгиот период на инкубација доведе до збрка околу дефинирањето на “асимптоматското“. Дали некој се разболел четири, пет или дури 14 дена по изложување на вирусот?
“Има луѓе кои се позитивни, но немаат симптоми. Има такви кои покажуваат многу благи или атипични симптоми. Постојат и лица кои мислат дека се асимптоматски се додека не ги испрашате за некои необични манифестации на КОВИД-19. А, понекогаш сето тоа се нарекува асимптоматско“, вели д-р Мерибет Секстон, од Универзитетот Емори.
И сите тие категории на заболени може да го пренесат вирусот на други луѓе. На почетокот на јуни, Светската здравствена организација беше присилена да појасни дека коронавирусот може да го шират лица без симптоми, откако епидемиологот Марија Ван Керкхова изјави дека “мисли дека асимптоматското ширење на КОВИД-19 е многу ретко“.
Асимптоматските болни ја шират заразата, дури и ако не покажуваат симптоми, но и натаму не е познато во која мера. Останува нејасно и како реагира асимптоматскиот имун систем и дали тие лица ќе развијат антитела или друга заштита против вирусот.
Студија објавена кон средината на минатиот месец во списанието Nature Medicine, прва го истражувала имунолошкиот одговор на болните со асимптоматски коронавирус. Истражувачите следеле 37 асимптоматски пациенти во Кина и ги споредувале со 37 лица кои имале симптоми на болеста. Иако мала, студијата покажала дека асимптоматските пациенти развиле антитела, но и дека нивното ниво се намалило за два до три месеци.
Се уште е непознато дали антителата на КОВИД-19 даваат било каков имунитет и колку таа заштита трае, особено меѓу асимптоматските пациенти. Можно е дури и ниското ниво на антитела да нудат одредена заштита, но за тоа да се утврди потребни се уште истражувања.
“Додека не знаеме колку асимптоматските пациенти се одговорни за ширење на заразата, треба упорно да се нагласува важноста на носењето маска во јавност. Така се намалува шансата да заразите други лица или да вдишите вирусни честички кои ги исфрлаат други“, предупредува д-р Секстон.
