Популарната американска серија „Вовед во анатомија“ создава погрешна слика за здравствената заштита во САД, како и за начинот и брзината на лекување. Оваа серија достигна бројка од 9 милиони гледачи по епизода откако започна да се прикажува во 2005 година.
Иако никаде не е означено дека се работи за едукативна содржина, за Американците „Вовед во анатомија“ е примарен извор на здравствени информации. По анализата на 269 епизоди, тим на хирурзи трауматолози заклучил дека серијата создава нереални очекувања кај пациентите, пишува „Дејли мејл“.
„Мислам дека повеќето болници, хирурзи и медицински сестри не сфаќаат колку нешто како што е телевизиска серија може да влијае на она што пациентот го очекува од грижата што ја добива“, вели д-р Џордан Вајнберг од болницата и медицинскиот центар во Феникс, „St. Joseph’s “, исто така, и главен автор на студијата.
„Тоа е особено важно од аспект на трауматологијата, бидејќи на овие пациенти докторите немале време да им кажат што да очекуваат. Одеднаш ќе се најдат во болница, а единствена референтна точка би можела да им биде серијата „Вовед во анатомија“, додава д-р Вајнберг.
Тој напоменува дека не ја критикува серијата, и дека е всушност многу импресиониран од точноста на податоците и многу мали детали. Тоа воопшто и не е изненадување, бидејќи нејзините креатори се консултираат со здравствени организации и специјалисти за се да биде што поверодостојно во серијата.
„Не ги обвинувам пациентите што креираат одредена слика за нас. И чувството за тоа како работи полицијата или адвокатската канцеларија, веројатно, се заснована на она што луѓето го гледаат на телевизија, бидејќи немаат други искуства, а исто е и со болниците“, нагласува д-р Вајнберг.
Тој појаснува дека на ТВ, времето на закрепнување на пациентот е драматично забрзано, а смртноста исклучително висока, па пациентите може истото да го очекуваат во реалноста или да се плашат. За овој заклучок има и конкретни бројки.
Имено, тој и неговиот тим проучувале 290 фиктивни пациенти во серијата за време на 269 епизоди во првите 12 сезони. Потоа овие податоци ги споредиле со 4 812 повредени пациенти регистрирани во Националната трауматолошка база за 2012 година при што ги добиле горенаведените резултати.
Стапката на смртност во серијата била три пати повисока отколку во реалниот живот – 22 проценти во споредба со реалните 7 проценти. Исто така, повеќето пациенти (71 %) од серијата заминале директно од возилото на брзата помош во сала за операција, додека реалната бројка е 25 %
Во серијата, само шест отсто од преживеаните пациенти, биле префрлени во установа за долготрајна нега, наспроти 22 проценти во реалниот живот. Половина од фиктивните пациенти после сериозни повреди минале помалку од една недела во болница, додека 80 отсто од пациентите од реалниот живот остануваат многу подолго во болница.
