За штетноста на социјалните мрежи врз човечката психа се повеќе и повеќе се зборува, но во секој случај тие станаа дел од нашиот секојдневен живот. Разликата овојпат е што британските научници отидоа чекор понатаму и одлучија да проверат која социјална мрежа е најлоша по тоа прашање.
Во студијата биле вклучени 1 500 луѓе на возраст помеѓу 14 и 23 години, кои биле тестирани за нивните ставови и начини за користење на најпопуларните социјални мрежи – Инстаграм, Снепчет, Твитер, Фејсбук и Јутјуб и нивното влијание врз човечката психа.
Препорака: Социјалните мрежи да не се користат повеќе од два часа дневно
Истражувањето покажало дека Инстаграм предничи во лошото влијание, особено кај младите жени. Поточно, оваа популарна апликација нуди можност да се филтрираат сите несовршености, па корисниците добиваат впечаток дека сите други водат совршен живот и така изгледаат. Затоа корисниците на оваа социјална мрежа се чувствуваат депресивно, осамено и неисполнето.
Единствена социјална мрежа која доби позитивни коментари е Јутјуб. Научниците, исто така, откриле и советуваат дека социјалните мрежи не треба да се користат повеќе од два часа дневно.
