Извештај објавен од JAMA Cardiology открива како предолгото седење влијае на луѓето од 21 различна земја. Иако оваа студија е една од најголемите објавени на оваа тема, не е прва што ја открива тешката вистина за тоа што седечкиот начин на живот може да направи за вашето здравје. Оваа и други студии на оваа тема објавени во текот на изминатата деценија открија дека долгото седење секој ден без пауза може брзо да го остари вашето тело на повеќе начини.
Како долготрајното седење го забрзува стареењето?
Канцелариската работа отсекогаш била закана за наоѓање време за движење во текот на денот. Имајќи предвид дека работата од дома станува се почеста во последните неколку години, а особено со почетокот на ковид пандемијата, уште повеќе луѓе седат со часови на своите работни столици или креветот. За жал, тоа може да предизвика сериозни последици по здравјето на населението.
Студијата JAMA Cardiology открила дека сите популации што ги проучувале имале резултати кои докажуваат дека повеќе време поминато во седење претставува поголем ризик од здравствени компликации. Седењето помеѓу шест и осум часа на ден „го зголемува релативниот ризик од срцеви заболувања и прерана смрт за околу 12-13 проценти, во споредба со лицата кои седат помалку од четири часа на ден. Зголемете го тоа време на осум часа или повеќе, а релативниот ризик се зголемува до огромни 20 проценти.
Клиниката Мајо, исто така, ги предупредува луѓето за опасностите од повеќечасовното седење без пауза за движење, тврдејќи дека тоа што ваквиот начин на работа станува рутинска навика, може да биде поврзано со здравствени компликации како што се висок крвен притисок, обезност, висок шеќер во крвта, но и вишок висцерална маст, која е вид на маснотија што се таложи околу вашите органи во близина на стомакот. Всушност, по преглед на 13 студии кои се занимаваат со времето на седење во однос на количината на дневна активност, истражувачите од клиниката Мајо заклучуваат дека „оние кои седеле повеќе од осум часа на ден без физичка активност имале ризик од смрт сличен на оној кој претставува прекумерната телесна тежина и пушењето“.
