Наспроти врежаното верување кај народот, се чини, дека мозокот на постарите луѓе, сепак, може да создава нови клетки во хипокампусот, делот од мозокот, одговорен за памтење и емоции, покажало истражувањето, кое го спровеле американските научници од Универзитетот Колумбија во Њујорк. Имено, кај постарите лица бил забележан ист капацитет за создавање нови клетки како и кај младите.
Меѓутоа, хипокампусот се намалува кај луѓето со Алцхајмерова болест.
Исто така, било забележано дека кај лицата на постара возраст во мозокот е помалку изразен процесот на раст на нови крвни садови (ангиогенеза).
Научниците потсетуваат дека животните навики кои го намалуваат ризикот од срцеви заболувања, исто така, помагаат во зачувување на здравјето на мозокот, вклучувајќи го и непушењето, одржувањето на здрава телесна тежина и крвен притисок, здрава исхрана и вежбање.
Според мислењето на научниците, идните истражувања треба да одредат кои фактори можат да помогнат во стимулирање на поголемо производство на неврони или подобра поврзаност меѓу невроните кај постарите лица, е објавено во научното списание „Cell Stem Cell“, кое се фокусира на истражувањата поврзани со матични клетки.
