Зголемувањето на времето помеѓу оброците помага да се подобри севкупното здравје и да се зголеми животниот век, пренесува Science Daily по најново спроведено истражување.
Позитивниот ефект на продолженото гладување се набљудува независно од количеството на калории и видот на консумираните продукти, тврдат група американски научници.
Истражувачите спровеле експеримент со 292 експериментални глувци кои биле поделени во две групи. Половина од глодарите се придржувале кон диета богата со протеини и влакна. Животните сепак имале пристап и до храна со помала содржина на шеќери и масти. Во втората фаза на студијата, глувците биле поделени во три подгрупи: првата имала 24-часовен пристап до храна, втората подгрупа добила 30 % помалку калории и трета подгрупа се хранела еднаш дневно, но со исто количество на калории како и првата подгрупа. Кај втората и третата подгрупи се добивал подолг интервал помеѓу оброците. Како резултат на тоа, општата физичка состојба на глувците се подобрила и нивниот животен век се зголемил.
„Зголемувањето на периодот на гладување без намалување на внесот на калории, независно од диетата, води кон подобрување на целокупниот здравствен статус. Овој подолг период на секојдневен пост најверојатно, ќе ги обнови и зачува функциите кои не се манифестираат при континуираното консумирање на храна“, вели д-р Рафаел де Кабо, раководител на експериментот на Националниот институт за старосни проблеми во САД.
Научниците нагласуваат дека метаболизмот кај глувците е многу сличен со човекот. Истражувачите веруваат дека резултатите од нивната работа ќе им помогнат на луѓето да одржуваат здрава телесна тежина и да ги ограничат промените поврзани со стареењето кои имаат негативно влијание врз метаболизмот.
