Долготрајните последици од коронавирусот на здравјето кај оние кои се опоравиле од оваа болест и натаму се непознаница. Во голем број земји веќе функционираат постковид амбуланти за сите оние кои и по акутната фаза на болеста имат здравствени проблеми.
Доц. Д-р Игор Барковиќ интернист пулмолог во Клиничката болница во Ријека објаснува какви знаци за тревога ѕвонат кај пациентите кои закрепнале од КОВИД-19 кој се занимва со овие болни, во првата амбуланта од ваков профил во Хрватска.
“Увидовме дека се поголем број на болни по лекувањето на акутната болест имаат проблеми како отежнато дишење, промени кои се видливи на рентген и компјутерска томографија во белите дробови. Меѓу нив се оние кои ја преболеле најтешката форма на болеста и биле лекувани на респиратори до оние кои имале многу благи симптоми на болеста“, објаснува д-р Барковиќ.
Тој потенцира дека секаде во светот, т.н. постковид синдром е нешто ново.
“Всушност не знаеме како ќе се однесуваат пациентите кои имаат т.н. постковид синдром. Се работи за период по кој веќе не се инфективни, откако немаат симпоми на акутната болест. Не знаеме дали последиците трајно ќе останат, дали ќе се повлечат по некое време и како тоа воопшто да се лекува. Тоа се е ново за сите во светот“, додава пулмологот.
Според него, станува збор за голем број луѓе, многу поголем од бројот на оние чија форма на болеста барала болничко лекување. Се работи за пациенти кои чувствуваат хроничен замор, слабост, малаксалост, пореметување на помнењето, концентрацијата, спиењето, со главоболки до таа мера да им го намалуваат квалитетот на животот и работната способност и продуктивност.
Д-р Барковиќ вели дека за жал, КОВИД-19 не влијае само на системот за дишење. Тој делува и на малите крвни садови и на згрутчувањето на крвта, па е зголемена можноста за создавање на згрутчувања, дури и месеци по прележаната болест.
Се среќаваме, вели тој, и со мозочни удари и белодорбни емболии кои се јавуваат откако ќе помине акутната болест. Пациентите, ќе бидат подобро, ќе отидат дома и се враќаат кога ќе почнат тешко да дишат или добиваат мозочен удар.
Тие пореметувања во микроциркулацијата може да ги предизвикаат веќе наведените симптоми, како пореметување на концентрацијата.
“Специфичноста на оваа болест е во тоа што лекувањето оди бавно “, додава пулмологот на крајот.
