Речиси сите жени со рак на ендометриум имаат историја на постменопаузално крвавење (PMB), покажала анализата на 129 студии. Инаку, предвидениот пораст на инциденцата на ракот на ендометриумот и морталитетот од него, ја потенцира важноста на стратегиите за рано откривање и превенција на рак на ендометриумот.
Постменопаузалното крвавење се јавува кај околу 91 процент на жени со рак на ендометриумот, но само кај 9 отсто од жените со постменопаузално крвавење им е дијагностициран рак на ендометриумот, истакнуваат експертите.
Кај жените со рак на ендометриум во стадиум I, распространетоста на постменопаузалното крвавење изнесувала 94 проценти.
Исто така, било забележано дека ризикот од рак на ендометриум бил помал кај жени со постменопаузално крвавење кои земале хормонална терапија.
Моменталните клинички упатства препорачуваат дијагностичка обработка на жените, кои имаат постменопаузално крвавење со трансвагинален ултразвук, биопсија на ендометриум и хистероскопија со биопсија.
Лекарите, секако, треба да ги информираат своите пациенти дека постменопаузалното крвавење може да биде симптом на рак на ендометриумот и дека во случај на негова појава треба задолжително да се јават на лекар.
Од друга страна, исто така, треба да се знае дека постменопаузалното крвавење е поврзано со многу бенигни состојби и дека кај помалку од 1 на 10 жени со споменатото крвавење ќе се дијагностицира рак на ендометриумот, пишува „JAMA Internal Medicine“.
