Студија објавена во списанието Brain, Behavior and Immunity открила дека повеќе од половина од лицата кои се опоравиле од болеста КОВИД-19, подоцна страдаат од ментални пореметувања како депресија и посттрауматско стресно нарушување.
Во оваа прва студија спроведена на оваа проблематика, научниците испитале 402 лица кои биле хоспиталирани поради КОВИД-19. Еден месец по болничкото лекување морале да исполнат прашалник кој им бил даден.
Резултатите покажале дека 28 проценти од лицата страдаат од посттрауматско стресно нарушување, додека дури 42 проценти доживеале анксиозност, 31 процент депресија, а 20 проценти искусиле симптоми на опсесивно-компулсивно пореметување. Дури 40 проценти од испитаниците навеле дека се соочуваат со хронична несоница. Околу 56 проценти од испитаната група страдала барем од едно ментално пореметување.
Голем број пациенти пријваиле психички или невролошки нуспојави кои може да останат присутни со недели и месеци, а тоа вклучува замор, збунетост и промени во однесувањето. Научниците се сомневаат дека оваа болест предизвикува воспаленија во мозокот, што може да биде причина за горе споменатите проблеми.
“Ако се земе предвид алармантното влијание на оваа инфекција на менталното здравје, советуваме дека е потребно да се проучува психопатологијата на пациентите со цел да се дијагностицира проблемот, да се лекува и да се следи напредокот, а се во насока на олеснување на товарот што го носи оваа болест и кој е многу тежок“, додаваат авторите.
Неодамнешни истражувања покажале дека менталните проблеми се во пораст ширум светот. Анксиозноста поради социјалната изолација, грижата околу финансиите и одвоеноста од семејството и пријателите, се само некои од тегобите.
“Како психијатар, најчесто меѓу пациентите за време на пандемијата ми се вработени мајки кои се обидуваат да се носат со полно работно време од дома, а се грижат и за семејството во истиот простор“, вели психијатарката Сузан Сонг.
“Често тие наведуваат проблеми како чувство на немир и недостаток на енергија, потешкотии со фокусирањето и контролирањето на емоциите. Изгубиле интерес за хоби, мотивација, а им се појавуваат и мисли за смрт и смисолот на живот“, додава д-р Сонг.
Доколку и самите минувате низ потешкотии поради целата ситуација која не опкружува, не сте сами. Докторката советува да се информирате за справување со новите емоции и да побарате стручна помош за полесно да ги сфатите промените кои н се случуваат за успешно да си ја олесните ситуацијата.
