Многу научни студии докажале дека гледањето телевизија е штетно само заради долго време поминато во седечка положба. Постојат техники како може да се избегне тоа, но и превентивни мерки кои го минимизираат ризикот од заболување заради оваа лоша навика.
Предупредувањата за претераното гледање телевизија се стари колку и самата телевизија. Се поставува прашањето колку е тоа навистина штетно?
Бројни студии ги наведуваат здравствените ризици кои можат да се појават заради поврзаноста на седењето во поголемиот дел од животот и бројот на часови поминати пред екранот.
Податоците од истражувањето објавено во „JAMA Psychiatry” покажуваат дека помладите возрасни личности кои гледаат телевизија три или повеќе часа дневно и кои слабо вежбаат имаат поголем ризик за когнитивни проблеми во средните години.
„Ова количество време поминато пред телевизорот би можело двојно да го зголеми ризикот од рана смрт во однос на гледањето телевизија еден час или помалку секој ден“, стои во истражувањето објавено во „Journal of American Heart Association”.
Според студијата во магазинот „Circulation”, пак, луѓето кои гледаат телевизија пет или повеќе часа дневно имаат и зголемен ризик од умирање од белодробна емболија во споредба со оние кои поминуваат помалку време пред екранот.
Меѓутоа се претпоставува дека главен прекинувач за сите овие проблеми е претераното седење и намалената физичка активност. Научниците сметаат дека единствено решение е да се намали гледањето телевизија на еден до два часа и лесно да се вежба до околу 60-75 минути секој ден.
Според истражувањето објавено во магазинот „The Lancet”, тоа нема во потполност да ги елиминира ризиците поврзани со претераното гледање телевизија, но сигурно може значително да ги ублажи. Исто така, се советува луѓето да најдат забава во активностите кои вклучуваат движење и кои ќе го заменат седењето пред телевизор.
Запаметете дека здравствените ризици доаѓаат исклучиво од претераното гледање телевизија од ден на ден. Доколку оваа рутина ја одбегнете неколку дена во неделата, не би требало да биде премногу штетно. Практикувајте само 15 минути вежбање или едноставно истегнете се неколку пати додека сте пред екранот и обидете се да му оддолеете на поривот да грицкате висококалорична храна додека гледате телевизија, тоа делумно ќе го реши проблемот.
