Речиси една третина од лица кои прележале КОВИД-19 пријавиле барем еден постојан симптом 6 до 12 месеци по заразата со коронавирус, покажало данско истражување спроведено на 152.000 лица.
Со студијата е опфатена една од досега најголемите групи што ја сочинувале заболени од КОВИД-19, а важно е да се нагласи дека испитаниците не биле хоспитализирани поради последиците од оваа болест.
Нивната состојба е следена подолго во однос на останатите, претходно спроведени поголеми студии, објавија научниците од Институтот Стејт Серум (ССИ) во Данска, водечко зздравствено тело во подрачјето на заразните болести.
Студијата базирана на прашалник покажала дека нејзините учесници најчесто пријавувале долготрајни симптоми како промени на сетилото за мирис и вкус, но и постојан замор.
Истражувањето е спроведено помеѓу септември 2020 година и април 2021 година, многу пред појавата на варијантата омикрон. Со анкетата се споредени одговорите на 61.000 лица кои биле позитивни на коронавирус шест, девет или 12 месеци претходно, со одговорите на лица од група од 91.878 испитаници кои биле негативни на тестирањето.
Севкупно, 29,6 отсто од испитаниците кои на тестирањето биле позитивни на КОВИД-19, пријавиле барем еден постојан физички симптом 6 до 12 месеци по инфекцијата, во споредба со 13 отсто од лицата во контролната група.
ПОВЕЌЕ ОД ПОЛОВИНА ОД ПОЗИТИВНИТЕ НА КОВИД-19 ЧУВСТВУВААТ ДОЛГОТРАЈНИ СИМПТОМИ
Малку повеќе од половината (53,1 отсто) лица со позитивни резултати на тестирањето на КОВИД-19, рекле дека чувствувале ментална и/или физичка исцрпеност, дека имаат проблеми со спиењето или пријавувале различни когнитивни проблеми во период од шест до 12 месеци по почетокот на инфекцијата. Во контролната група вакви проблеми пријавиле 11,5 отсто од испитаниците.
Студијата која се уште не поминала рецензија, покажала дека меѓу лицата кои прележале КОВИД-19 почести се и новодијагностицирани случаи на депресија и анксиозност.
Авторот на студијата Андрес Хвид, професор по епидемиологија на ССИ, вели дека резултатите од студијата се уште еден показатале дека креаторите на политиката мора да ги земат предвид споменатите долготрајни последици од КОВИД-19 за кои се повеќе се зборува.
“Ова би требало да се земе предвид кога ги вагате ризиците и придобивките од медицинските интервенции и вакцинацијата“, вели тој, додавајќи дека е потребно да се спроведат и дополнителни истражувања.
Досегашните проценки за преваленцата на долготрајниот КОВИД-19 варираат.
Светската здравствена организација (СЗО) новонастанатиот синдром го нарекува пост-ковид-состојба што ја карактеризираат некои трајни симптоми, како што се замор или недостаток на воздух, а се јавуваат три месеци по почетокот на инфекцијата и траат најмалку два месеци.
СЗО проценува дека ваквите симптоми зафаќаат помеѓу 10 и 20 проценти од заболените.
Дејвид Страјн, предавач на Медицинскиот факултет на Универзитетот Ексетер во Велика Британија, кој не учествувал во студијата, ги оценува резултатите од извештајот како “прилично загрижувачки“.
“Ако омикрон предизвикува долг КОВИД-19 во ист процент како и претходните варијанти на коронавирусот, во следните 12 месеци би можеле да имаме голема криза со пациенти со нарушено здравје, особено со оглед на бројот на луѓе кои беа изложени на овој сој на коронавирусот“, потенцира професорот.
