Кога сакаме да ослабеме еден од првите чекори често се однесува на намалувањето или дури и исклучувањето на мастите од исхраната. Меѓутоа, додека одделни типови масти, секако, треба да се одбегнуваат, некои други, здрави масти можат дури и да помогнат во процесот на слабеење. Станува збор за омега-3 масните киселини кои ги има во морската риба (лосос, скуша, туна), лененото семе, оревите и маслото од ореви, како и за омега-9 масните киселини кои се наоѓаат во маслинките и маслиновото масло, авокадото… Овие масти не само што го забрзуваат метаболизмот, туку помагаат и подобро да спиеме, го подобруваат расположението, го зајакнуваат имунитетот и го поттикнуваат здравјето на кожата и косата.
Од друга страна, омега-6 масните киселини кои се наоѓаат во маслото од соја, сончогледот и пченката би требало да се ограничат, како и заситените масти какви што има во месото, сирењето, путерот, полномасното млеко и млечните производи.
И на крајот, хидрогенизираните и транс-мастите би требало да се одбегнуваат (или потполно да се исклучат од исхраната), овие масти ги има во маргаринот, намазите и сосевите, слаткиот и солен кекс, колачите, тортите, печивата и брзата храна.
