Коските се еден од најважните органи во човечкиот организам и потребна им е посебна нега за да останат здрави. Со годините нивната густина се намалува и се зголемува ризкот од појава на остеопороза, а како последица доаѓа до различни скршеници.
Остеопорозата е болест на зрелото доба која настанува по намалување на коскената маса и пореметување на градбата на коските, поради што коските стануваат кршливи и подложни на скршеници. Околу 10% од целокупната популација има остеопороза, а почеста е кај жените, отколку кај мажите.
За да се превенира болеста, неопходно е да се внесува доволно количина на калциум и витамин Д, да се избегнува пушење и алкохол, да се одржува нормална телесна тежина и да се биде физички активен.
ФИЗИЧКА АКТИВНОСТ
Секојдневните вежби за одржување на добра форма, пешачење, прошетка, занимавање со спорт и вежби на истегнување на мускулите, се предуслов за здрав живот воопшто, но се посебно значајни во превенција на остеопорозата, за да се спречи губење на коскената маса.
Вежбите даваат добри резултати единствено ако се прават редовно, а пред се се наменети за жените кај кои постои голем ризик од остеопороза: слаби личности, личности со изразена генетска предиспозиција, лица со засилена работа на штитната жлезда и жени во постменопауза.
БАЛАНСИРАН ВНЕС НА КАЛЦИУМ И ВИТАМИН Д
Калциумот е од витално значење за одржување на силни и здрави коски, а витаминот Д е важен оти помага во апсорпција на овој елемент. За жал, многу е тепко да се внесат доволни количини на витамин Д преку исхраната. На располагање е ограничен број на намирници – масна риба (како лосос), некои видови на млеко и сок од портокал. Оралната дополна на витамин Д во доза од 700 до 800 меѓународни единици дневно, го намалува ризикот од фрактури на колкот и било кои други скршеници.
